سیلاب سے متاثرہ علاقوں میں بجلی بحالی پر پاور ڈویژن کی 27 ستمبر تک کی رپورٹ جاری

اسلام آباد (اُردو پوائنٹ اخبارتازہ ترین - اے پی پی۔ 27 ستمبر2025ء) سیلاب سے متاثرہ علاقوں میں بجلی بحالی پر پاور ڈویژن کی 27 ستمبر تک کی رپورٹ جاری کردی گئی ہے۔ ہفتہ کو پاور ڈویژن سے جاری رپورٹ میں کہا گیا ہے کہ فیسکو کے زیرِ انتظام علاقوں میں 28 گرڈ اور 81 فیڈرز متاثر ہوئے، متاثرہ فیڈرز میں 70 مکمل اور 11 جزوی طور پر بحال کردئیے گئے۔ فیسکو کے 1871 متاثرہ صارفین کیلئے بجلی کی بحالی کا کام تقریباً28 ستمبر تک مکمل کرنے کی توقع ہے۔

فیسکو کے زیرِ انتظام علاقے فیصل آباد ، چنیوٹ اور میانوالی میں بجلی بحالی کا کام مکمل ہو چکا ہے۔ لیسکو کے 67 متاثرہ فیڈرز میں سے 66 مکمل اور 1 کو جزوی طور پر بحال کردیا گیا ہے، لیسکو کے 441 متاثرہ صارفین کیلئے بجلی کی بحالی کا کام تقریباً 28 ستمبر تک مکمل کرنے کی توقع ہے، لیسکو کے زیرِ انتظام علاقے لاہور، ننکانہ، شیخوپورہ اور اوکاڑہ میں بجلی کی بحالی کا کام مکمل ہو چکا ہے۔

(جاری ہے)

رپورٹ میں یہ بھی بتایا گیا کہ میپکو کے 181 متاثرہ فیڈرز میں سے 42 مکمل اور 136 جزوی طور پر بحال کر دیئے گئے ہیں ، میپکو کے زیرِ انتظام علاقوں میں پانی اترتے ہی متاثرہ فیڈرز کی مکمل بحالی کا کام شروع ہو جائے گا ۔ گیپکو کے 11 گرڈز اور 103فیڈرزمتاثر ہوئے ، جن میں سے 102 فیڈرز مکمل اور 1 جزوی طور پر بحال کر دیا گیا ہے ، گیپکو کے 16 متاثرہ صارفین کیلئے بجلی بحالی کا کام سیلاب کا پانی اترنے پر مکمل کر لیا جائے گا۔

رپورٹ میں بتایا گیا ہے کہ پیسکو کے 88 فیڈرز مکمل اور 3 جزوی طور پر بحال کردئیے گئے ہیں، پیسکو کے زیرِ انتظام علاقے سوات، صوابی اور ڈی آئی خان میں بجلی کی بحالی کا کام مکمل ہو چکا ہے ۔ ٹیسکو کے علاقے شمالی وزیرستان اور خیبر کے 18 متاثرہ فیڈرز مکمل طور پر بحال کر دیئے گئے ہیں ، ہیزیکو کے زیرِ انتظام علاقے مانسہرہ کے 3 متاثرہ فیڈر مکمل طور پر بحال کر دیئے گئےہیں، سیپکو کے زیرِ انتظام علاقے کے 44 متاثرہ فیڈر عارضی طور پر بحال کر دیئے گئے ہیں، مجموعی طور پر 51 گرڈ اور 588 فیڈرز متاثر ہوئے، مجموعی طور پر 389 فیڈر مکمل اور 196 جزوی طور پر بحال کر دیئے گئے ہیں۔