چیف سیکرٹری خیبرپختونخوا شہاب علی شاہ کی زیرصدارت گورننس امور کے حوالے سے جائزہ اجلاس

پشاور (اُردو پوائنٹ اخبارتازہ ترین - اے پی پی۔ 29 ستمبر2025ء) چیف سیکرٹری خیبرپختونخوا شہاب علی شاہ کی زیرصدارت گورننس امور پر ہفتہ وار جائزہ اجلاس منعقد ہوا۔ جس میں تجاوزات کے خاتمے، اشیائے خورونوش کی قیمتوں میں استحکام، سیاحت کے فروغ، صوبائی دارالحکومت کی اپ لفٹ اور مستقبل میں سیلاب سے بچاؤ کے لئے جاری اقدامات کا تفصیلی جائزہ لیا گیا۔

اجلاس میں انتظامی سیکرٹریز اور دیگر اعلیٰ حکام شریک ہوئے جبکہ ڈپٹی کمشنرز نے ویڈیو لنک کے ذریعے شرکت کی۔اجلاس کو بتایا گیا کہ 30 جون سے اب تک تجاوزات کیخلاف آپریشن میں 207 بلڈنگز کو سیل کیا گیا ہے۔ 1048 کنال پر محیط غیر قانونی بلڈنگز کو گرایا گیا ہے۔ 1741 کنال پر قائم تجاوزات ہٹائی گئی ہیں جبکہ گزشتہ ہفتے کے دوران بھی 20 کنال سے زائد احاطے پر تجاوزات ہٹائی گئی ہیں۔

(جاری ہے)

اس کے علاوہ اجلاس کو مختلف محکموں کے 52،562 کنال انکروچڈ لینڈ کے بارے میں آگاہ کیا گیا ہے جس کی نشاندہی کی گئی ہے۔ یہ ڈیٹا تمام ڈپٹی کمشنرز کے ساتھ شئیر کردیا گیا ہے جس پر ضلعی انتظامیہ محکموں کے فیلڈ افسران کے ساتھ مل کر کارروائی شروع کررہے ہیں۔چیف سیکرٹری نے ہدایت کی کہ تمام محکمے ان اراضیات کو بہتر استعمال میں لانے کے لئے اپنی پلاننگ مکمل کریں۔

ڈپٹی کمشنر پشاور نے بتایا کہ 38 کلومیٹر بڈھنی نالہ پر پشاور کی ضلعی انتظامیہ نے پلان تیار کیا ہے۔نالے پر بنے غیر قانونی سات تعمیرات اب تک گرائے گئے ہیں جس سے پانی کے بہاؤمیں خلل پڑتا تھا۔چیف سیکرٹری نے ہدایت کی کہ پشاور میں ہاؤسنگ سوسائٹیز کو لینڈ یوز پلان کے تحت ہی این او سیز جاری کی جائیں۔ جو اراضی لینڈ یوز پلان میں گرین لینڈ ہے وہاں پر تعمیرات کی اجازت نہ دی جائے۔

غیر قانونی ہاؤسنگ سوسائٹیز کا ڈیٹا اکٹھا کیا جائے تاکہ قانونی کاروائی عمل میں لائی جاسکے۔اجلاس کو گندم، آٹے اور چینی کی صورتحال پر بھی بریفنگ دی گئی۔اجلاس کو آگاہ کیا گیا کہ پبلک پرائیویٹ پارٹنرشپ کے تحت سرمایہ کاری کے لئے منصوبوں کی پچ بک، اور پی پی پی پراجیکٹ کی ٹریکنگ پر کام کیا جارہا ہے۔ اس کے علاوہ پشاور ڈی آئی خان موٹروے، سوات موٹروے فیز ٹو، ٹھنڈیانی سیاحتی منصوبہ، درابن اکنامک زون، گنھول انٹیگریٹڈ ٹورازم زون پر پیش رفت کے بارے میں بھی اجلاس کو بتایا گیا۔

سیکرٹری ایریگیشن نے آبی گذرگاہوں کی ڈی سلٹنگ صفائی بارے میں مختلف آپشنز پیش کئے اور انہوں نے کہا کہ اس حوالے سے جامع پلاننگ کی گئی ہے جس کی صوبائی کابینہ سے منظوری لی جائے گی۔اجلاس کو پشاور ڈویلپمنٹ اتھارٹی کے منصوبوں کے بارے میں بتایا گیا۔ چیف سیکرٹری نے گزشتہ روز نیو جنرل بس ٹرمینل پشاور کا دورہ کرکے اس پر جاری ترقیاتی کام کا جائزہ لیا تھا جبکہ محکمہ منصوبہ بندی و ترقی خیبرپختونخوا کو ایک ہزار ملین کا پی سی ون منظوری کیلئے بھیجا گیا ہے جس میں جی ٹی روڈ جمرود روڈ، رنگ روڈ کے روڈ فرنیچر بحالی شامل ہے۔

یہ اقدامات صوبائی دارالحکومت کی اپلفٹ کے تحت اٹھائے جا رہے ہیں۔اجلاس کو بتایا گیا کہ محکمہ سیاحت نے گلیات میں بی این اے روڈ اور گلیات کیلئے سالڈ ویسٹ مینجمنٹ پلان صوبائی کابینہ منظوری کے لئے بھیج دیا ہے یہ اقدام سیاحت کے فروغ اور ماحولیاتی تحفظ کے لئے کیا جارہا ہے۔