کوئٹہ، ایف سی ہیڈکوارٹرز پر خودکش حملے کا مقدمہ نامعلوم دہشت گردوں کیخلاف درج

خودکش حملے میں ہلاک دہشت گردوں کی شناخت کے لیے نادرا سے رجوع کر لیا گیا

بدھ 1 اکتوبر 2025 20:15

کوئٹہ (اُردو پوائنٹ اخبارتازہ ترین - این این آئی۔ 01 اکتوبر2025ء) کوئٹہ کے ماڈل ٹائون علاقے میں گزشتہ روز ہونے والے ناکام خودکش حملے کے خلاف کانٹر ٹیررازم ڈیپارٹمنٹ نے نامعلوم دہشت گردوں کے خلاف انسدادِ دہشت گردی ایکٹ 1997 کی دیگر متعلقہ دفعات کے تحت مقدمہ درج کر لیا ہے۔پولیس ذرائع کے مطابق یہ حملہ فتن الخوارج سے منسلک دہشت گردوں کی کارروائی قرار دیا جا رہا ہے جو بھارتی خفیہ ایجنسیوں کی پراکسی کے طور پر کام کر رہے تھے۔

سیکورٹی ذرائع کے مطابق 30 ستمبر 2025کی صبح حالی روڈ پر ماڈل ٹان پشین اسٹاپ کے قریب ایک سوزوکی وین میں بارودی مواد بھر کر خودکش حملہ آور نے فرنٹیئر کانسٹیبلری ہیڈکوارٹرز کو نشانہ بنانے کی کوشش کی۔ حملہ آور کی گاڑی جیسے ہی سیکیورٹی حصار کے قریب پہنچی تو فورسز نے فوری طور پر ردِعمل دیتے ہوئے فائرنگ شروع کر دی۔

(جاری ہے)

شدید جھڑپ کے دوران خودکش حملہ آور سمیت پانچ دہشت گرد مارے گئے جن میں ایک حملہ آور دھماکے سے قبل ہی ہلاک ہوگیا۔

اس جھڑپ میں 12 معصوم شہری شہید اور 35 زخمی ہوئے جنہیں فوری طور پر سول اسپتال، بولان میڈیکل کمپلیکس اور سی ایم ایچ منتقل کر دیا گیا۔ زخمیوں کی اکثریت کی حالت خطرے سے باہر بتائی جا رہی ہے تاہم دو ایف سی اہلکاروں کو شدید چوٹیں آئیں۔دھماکے کی شدت اتنی زیادہ تھی کہ قریبی عمارتوں کے شیشے ٹوٹ گئے جس سے خواتین سمیت متعدد افراد زخمی ہوئے اور علاقے میں خوف و ہراس پھیل گیا۔ ریسکیو ٹیمیں اور بم ڈسپوزل اسکواڈ فوری طور پر جائے وقوعہ پر پہنچے اور علاقے کو محفوظ بنایا۔ ہلاک دہشت گردوں کے قبضے سے بھاری مقدار میں دستی بم، جدید اسلحہ، گرنیڈ لانچرز اور دیگر دھماکا خیز مواد برآمد ہوا جو ان کی منظم کارروائی کی نشاندہی کرتا ہے۔