Live Updates

مہنگائی کی شرح میں اضافہ، 4 فیصد سے اوپر چلی گئی

ٹماٹر، پیاز اور لہسن سمیت 19 اشیا کی قیمتوں میں اضافہ ہوا، ادارہ شماریات کی ہفتہ وار رپورٹ جاری

جمعہ 3 اکتوبر 2025 21:40

اسلام آباد (اُردو پوائنٹ اخبارتازہ ترین - این این آئی۔ 03 اکتوبر2025ء)ملک میں مہنگائی کی شرح اضافے کے بعد 4 فیصد سے اوپر چلی گئی،ٹماٹر، پیاز اور لہسن سمیت 19 اشیا کی قیمتوں میں اضافہ ہوا۔وفاقی ادارہ شماریات نے مہنگائی سے متعلق ہفتہ وار رپورٹ جاری کی ہے جس کے مطابق ہفتہ وار بنیادوں پر مہنگائی کی شرح میں 0.56 فیصد کا اضافہ ریکارڈ ہوا ہے۔

(جاری ہے)

ادارہ شماریات کے اعداد و شمار میں بتایا گیا کہ ایک ہفتے میں 19 اشیاء مہنگی ہوئیں اور 12کی قیمتوں میں کمی ہوئی جبکہ 20 اشیائے ضروریہ کی قیمتیں مستحکم رہیں۔

ادارہ شماریات کا بتانا ہے کہ ملک میں مہنگائی کی مجموعی سالانہ شرح 4.07 فیصد ہوگئی ہے۔ایک ہفتے میں ٹماٹر46.44 فیصد مہنگے ہوئے جبکہ پیٹرول 1.72 اور ہائی اسپیڈ ڈیزل 1.45 فیصد مہنگا ہوا، لہسن 1.41 اور پیاز 1.22 فیصد مہنگے ہوئے۔ اس کے علاوہ گھی، بیف، مٹن، دہی اور سگریٹس سمیت دیگر اشیاء مہنگی ہوئیں۔ایک ہفتے میں چکن 7.96 اور کیلے 0.78 فیصد سستے ہوئے، دالیں، آلو، کوکنگ آئل اور ایل پی جی سمیت دیگر اشیاء کی قیمتیں بھی کم ہوئیں۔