وزیراعظم شہباز شریف کا پاکستانی معیشت بارے بلومبرگ کی رپورٹ کا خیر مقدم

پیر 6 اکتوبر 2025 14:47

اسلام آباد (اُردو پوائنٹ اخبارتازہ ترین - اے پی پی۔ 06 اکتوبر2025ء) وزیراعظم محمد شہباز شریف نے پاکستانی معیشت کے حوالے سے بلومبرگ کی حالیہ مثبت رپورٹ کا خیر مقدم کرتے ہوئے کہا ہے کہ یہ رپورٹ پاکستانی معیشت پر عالمی سرمایہ کاروں کے اعتماد میں مسلسل اضافے کی مظہر ہے،ترقی کا یہ سفر اب جاری رہے گا۔ پیرکو وزیراعظم آفس کے میڈیا ونگ کی طرف سے جاری بیان کے مطابق وزیراعظم نے کہا کہ رپورٹ میں بتایاگیا ہے کہ پاکستان کے کریڈٹ ڈیفالٹ سواپ (Credit Default Swap - CDS) میں مضمر ڈیفالٹ کے امکانات میں 2200 بیسس پوائنٹس کی خاطر خواہ کمی واقع ہوئی ہے، پاکستان کے سی ڈی ایس کی قیمت میں نمایاں کمی پاکستانی معیشت پر عالمی سرمایہ کاروں کے اعتماد میں مستقل اضافے کی مظہر ہے۔

وزیراعظم نے کہا کہ عالمی درجہ بندی کے مطابق ابھرتی ہوئی معیشتوں میں اس وقت ترکیہ کے بعد پاکستان دوسرے نمبر پر ہے جو ہماری معیشت کے لئے اچھی خبر ہے۔

(جاری ہے)

انہو ں نے کہا کہ گزشتہ حکومت کے اختتام پر ملک ڈیفالٹ کے دہانے پر کھڑا تھا، بلومبرگ کی رپورٹ ہمارے لیے ایک انتہائی اہم سنگ میل اور ہماری ترقی کے سفر کی مظہر ہے، حکومت پاکستان کی انتھک کوششوں اور پاکستانی اور عالمی کاروباری برادری کے تعاون سے پاکستان کی ترقی کا وعدہ پورا ہوتا نظر آرہا ہے، اب ترقی کا یہ سفر ہرگز نہیں رکے گا۔\932