Live Updates

پنجاب ، سیلاب متاثرین کو 17 اکتوبر سے امدادی چیک دینے کی منظوری

پیر 6 اکتوبر 2025 20:51

لاہور (اُردو پوائنٹ اخبارتازہ ترین - این این آئی۔ 06 اکتوبر2025ء) وزیراعلیٰ پنجاب مریم نواز نے سیلاب متاثرین کو 17اکتوبر سے امدادی رقوم کے چیک دینے کی منظوری دے دی۔تفصیلات کے مطابق وزیراعلیٰ کی سربراہی میں ہونے والی صوبائی کابینہ کے اجلاس میں سیلاب متاثرین کیلئے حتمی امدادی پیکیج کے ساتھ متاثرین کو17اکتوبر سے امدادی رقوم کے چیک کی تقسیم شروع کرنے کی منظوری دی گئی۔

اجلاس میں طے پایا کہ جاں بحق فرد کے لواحقین کو 10لاکھ، مستقل معذوری پر 5لاکھ اور معمولی معذوری پر 3لاکھ دئیے جائیں گے، اسی طرح پکا گھرمکمل گرنے پر 10لاکھ اور جزوی طور پر گرنے پر3لاکھ جب کہ کچا گھر مکمل گرنے پر 5لاکھ اور جزوی طور پر گرنے پر ڈیڑھ لاکھ تک امداد دی جائے گی۔کابینہ اجلاس میں فیصلہ کیا گیا کہ بڑے مویشی پر5لاکھ تک اور چھوٹے جانوروں کے مرنے پر 50ہزار روپے دئیے جائیں گے، سیلاب کے دوران شاندار خدمات پر سول ڈیفنس رضاکاروں کی تنخواہوں میں 15ہزار اضافے کا اعلان کیا گیا ہے۔

(جاری ہے)

دوران اجلاس سیلاب کے دوران 25فیصد فصل کے نقصان پر 20ہزار فی ایکڑ کے ساتھ پنجاب کے 2855دیہات میں آبیانہ اور ایگری کلچر انکم ٹیکس معاف کرنے کا اصولی فیصلہ کیا گیا۔اجلا س میں پنجاب کے خلاف جھوٹ پھیلانے کے ٹرینڈ کی مذمت کرتے ہوئے کہا گیا کہ سب سیلاب متاثرین کو امداد ملے گی اور دریا کی گزرہ گاہ میں تعمیرات کی اجازت نہیں ملے گی۔