پروفیسر ڈاکٹر ضیاء الحق، وائس چانسلر کے ایم یو، دنیا کے ٹاپ 2 فیصد سائنسدانوں میں شامل ہوگئے

بدھ 8 اکتوبر 2025 15:36

پشاور (اُردو پوائنٹ اخبارتازہ ترین - اے پی پی۔ 08 اکتوبر2025ء) خیبر میڈیکل یونیورسٹی (کے ایم یو) پشاور کے وائس چانسلر، پروفیسر ڈاکٹر ضیاء الحق کو اسٹینفورڈ یونیورسٹی اور ایلسویرامریکا کی جانب سے مشترکہ طور پر جاری کردہ تازہ ترین عالمی رینکنگ میں دنیا کے ٹاپ 2 فیصد سائنسدانوں میں شامل کیاگیاہے جو نہ صرف شعبہ صحت اور اعلیٰ تعلیم بلکہ صوبہ خیبر پختونخوا کے لیے بھی فخر اور اعزاز کا باعث ہے ۔

کے ایم یو پشاور تر جمان کے مطابق یہ شاندار کامیابی پروفیسر ڈاکٹر ضیاء الحق کی طبّی تعلیم، تحقیق اور پبلک ہیلتھ کے شعبوں میں اُن کی غیر معمولی خدمات کا بین الاقوامی سطح پراعتراف ہے۔واضح رہے کہ اسٹینفورڈ یونیورسٹی کی یہ فہرست ہر سال اپ ڈیٹ کی جاتی ہے جس میں مختلف سائنسی شعبوں کے ان ممتاز محققین کو شامل کیا جاتا ہے جن کی تحقیق عالمی سطح پر نمایاں اثر رکھتی ہے۔

(جاری ہے)

اس رینکنگ میں محققین کے تحقیقی حوالہ جات ، تحقیقی اثر اور مصنفانہ کردار کی جانچ پر مبنی معیاری اشاریے استعمال کیے جاتے ہیں۔قبل ازیں مارچ 2025 میں، اعلیٰ تعلیم، تحقیق اور صحتِ عامہ کے میدان میں ان کی غیر معمولی خدمات کے اعتراف میں صدرِ پاکستان کی جانب سے پروفیسر ڈاکٹر ضیاء الحق کو ستارہ امتیاز سے بھی نوازا گیا تھاجو ملک کا ایک اعلیٰ ترین سول اعزاز ہے۔

اس شاندار اعزاز پر وزیر اعلیٰ/چانسلر کے ایم یو، وزیرصحت، یونیورسٹی کی فیکلٹی، طلبہ اور عملے نے بھرپور خوشی اور فخر کا اظہار کیا ہے۔ ان کا کہنا ہے کہ یہ کامیابی نہ صرف خیبر میڈیکل یونیورسٹی کے لیے باعثِ افتخار ہے بلکہ عالمی سطح پر پاکستان کی بڑھتی ہوئی تحقیقی صلاحیتوں کی بھی عکاس ہے، مذید یہ کہ پروفیسر ڈاکٹر ضیاء الحق کا دنیا کے ٹاپ 2 فیصد سائنسدانوں میں شامل ہونا جہاں اُن کی طبّی تحقیق اور اعلیٰ تعلیم کے فروغ کے لیے طویل اور مسلسل خدمات کا اعتراف ہے وہاں ان کی یہ کامیابی نوجوان محققین کے لیئے بھی ایک قابل تقلید مثال ہے۔