پروفیسر ڈاکٹر ضیا الحق دنیا کے ٹاپ 2 فیصد سائنسدانوں میں شامل

بدھ 8 اکتوبر 2025 21:35

خیبر (اُردو پوائنٹ اخبارتازہ ترین - این این آئی۔ 08 اکتوبر2025ء) خیبر میڈیکل یونیورسٹی کے وائس چانسلر پروفیسر ڈاکٹر ضیا الحق کو اسٹینفورڈ یونیورسٹی اور ایلیسویر امریکا نے دنیا کے ٹاپ 2 فیصد سائنسدانوں میں شامل کرلیا ۔یہ شاندار کامیابی پروفیسر ڈاکٹر ضیا الحق کی طبی تعلیم، تحقیق اور پبلک ہیلتھ کے شعبوں میں ان کی غیر معمولی خدمات کا بین الاقوامی سطح پر اعتراف ہے۔

(جاری ہے)

اسٹینفورڈ یونیورسٹی کی یہ فہرست ہر سال اپ ڈیٹ کی جاتی ہے، جس میں مختلف سائنسی شعبوں کے ان ممتاز محققین کو شامل کیا جاتا ہے جن کی تحقیق عالمی سطح پر نمایاں اثر رکھتی ہے۔قبل ازیں مارچ 2025 میں، اعلی تعلیم، تحقیق اور صحت عامہ کے میدان میں ان کی غیر معمولی خدمات کے اعتراف میں صدر پاکستان کی جانب سے پروفیسر ڈاکٹر ضیا الحق کو ستارہ امتیاز سے بھی نوازا گیا تھا، جو ملک کا ایک اعلی ترین سول اعزاز ہے۔

اس شاندار اعزاز پر وزیر اعلی اور چانسلر خیبر میڈیکل یونیورسٹی، وزیر صحت، یونیورسٹی کی فیکلٹی، طلبا اور عملے نے بھرپور خوشی اور فخر کا اظہار کیا ہے۔ ان کا کہنا ہے کہ یہ کامیابی نہ صرف خیبر میڈیکل یونیورسٹی کے لیے باعث افتخار ہے بلکہ عالمی سطح پر پاکستان کی بڑھتی ہوئی تحقیقی صلاحیتوں کی بھی عکاس ہے۔