خیبرپختونخوا،شانگلہ میں اپنی بیٹی سے مبینہ ریپ کا ملزم گرفتار،ایف آئی آردرج

بدھ 8 اکتوبر 2025 22:05

شانگلہ(اُردو پوائنٹ اخبارتازہ ترین - این این آئی۔ 08 اکتوبر2025ء) خیبر پختونخواکے ضلع شانگلہ میں ایک شخص کو اپنی نوعمر بیٹی کا مبینہ ریپ کرنے کے الزام میں گرفتار کر لیا گیا۔بشام تھانے کے ایس ایچ او افضل خان نے بتایا کہ متاثرہ لڑکی تھانے پہنچی، جس کے بعد ایف آئی آردرج کی گئی، اور مشتبہ شخص کو گرفتار کر لیا گیا۔ایف آئی آر کے مطابق مبینہ ریپ کا نشانے بننے والی لڑکی کی والدہ کو اس کے شوہر نے طلاق دے دی تھی، جس نے بعد میں سوات کی ایک اور خاتون سے شادی کر لی تھی، تاہم 9سال قبل سوتیلی ماں بھی اسے چھوڑ کر اپنے والدین کے گھر واپس چلی گئی تھی،ایف آئی آر کے مطابق لڑکی نے بتایا کہ وہ اپنے دو سوتیلے بھائیوں کے ساتھ رہتی ہے، جن میں سے ایک فالج کا شکار ہے، اور وہ کرائے کے مکان میں رہتے ہیں۔

(جاری ہے)

متاثرہ لڑکی نے بتایا کہ وہ گھر پر تھی اور اس کا بھائی کام کیلئے راولپنڈی گیا ہوا تھا، جب اس کے والد نے اپنے کمرے میں بلایا، جہاں اس نے اسے چاقو دکھا کر جنسی زیادتی کا نشانہ بنایا۔انہوں نے الزام لگایا کہ کسی کو واقعے کے بارے میں بتانے کی صورت میں اس کے والد نے قتل کی دھمکی بھی دی تھی۔متاثرہ لڑکی نے کہا کہ جب انہیں اپنے والد کے خلاف ایف آئی آر درج کرانے اور ان سے تحفظ حاصل کرنے کا موقع ملا تو وہ پولیس اسٹیشن گئی۔

پولیس نے تعزیرات پاکستان کی دفعہ 376(ریپ)اور 506(مجرمانہ دھمکی)کے تحت ایف آئی آر درج کرکے کیس کی مزید تفتیش شروع کردی۔تحصیل ہیڈ کوارٹر ہسپتال بشام کے ایک سینئر ڈاکٹر نے اپنا نام ظاہر نہ کرنے کی شرط پر بتایا کہ انہوں نے متاثرہ لڑکی کا معائنہ کیا اور تصدیق کی کہ ان کا ریپ کیا گیا ہے۔