کانگو: جیل اصلاحات پر نائجیریا کی خاتون افسر یو این ایوارڈ کی حقدار

اسلام آباد (اُردو پوائنٹ ۔ UN اردو۔ 09 اکتوبر 2025ء) جمہوریہ کانگو میں اقوام متحدہ کے امن مشن (مونوسکو) کے لیے خدمات انجام دینے والی نائجیریا کی خاتون افسر اولوکیمی ایبیکونلے قید خانوں کے نظام میں اصلاحات لانے پر اقوام متحدہ کے ٹریل بلیزر (مخترع) ایوارڈ کی حق دار قرار پائی ہیں۔

ایبیکونلے کا تعلق نائجیریا میں انصاف اور جیل خانہ جات کے شعبے سے ہے جو پانچ سال سے مونوسکو کے لیے خدمات انجام دیتے ہوئے جیل خانوں کے شعبے میں اپنی تکنیکی مہارت کے ذریعے نمایاں تبدیلی لائی ہیں جبکہ یہ شعبہ عام طور پر مردوں سے مخصوص سمجھا جاتا ہے۔

اقوام متحدہ کی نائب سیکرٹری جنرل امینہ محمد نے آج ادارے کے ہیڈکوارٹر میں منعقدہ تقریب کے موقع پر انہیں یہ اعزاز پیش کیا۔

(جاری ہے)

اس اعزاز کا آغاز 2022 میں ہوا تھا جس کا مقصد انصاف اور جیل خانہ جات کے شعبے میں غیرمعمولی کام کرنے والی خواتین افسروں کی خدمات کا اعتراف کرنا ہے جو مشکل اور خطرناک ماحول میں صنفی رکاوٹوں کو عبور کر کے اپنے مقصد کی تکمیل اور یہ ثابت کرتی ہیں کہ خواتین کا پائیدار امن کے قیام سے متعلق ہر مشن میں اہم کردار ہوتا ہے۔

غیرمعمولی جیل اصلاحات

اولوکیمی ایبیکونلے نے جمہوریہ کانگو کے بگڑے ہوئے نظام جیل خانہ جات میں اصلاحات کے نفاذ میں نمایاں کردار ادا کیا جہاں قیدیوں کی سلامتی اور ان کے انسانی حقوق کے درمیان توازن قائم کرنا ان کی ترجیح رہا۔

ان کی کوششوں کے نتیجے میں جیل کے ڈھانچے میں بڑی تبدیلیاں ممکن ہوئیں اور قیدیوں کی بحالی کے منصوبے بین الاقوامی اصولوں کے مطابق ترتیب دیے گئے۔

وہ کہتی ہیں کہ امن کا آغاز جیل کی دیواروں کے پیچھے سے ہوتا ہے۔

انہوں نے اوویرا جیل میں ایک بائیو گیس منصوبہ بھی شروع کیا جو فضلے سے صاف توانائی پیدا کرتا ہے۔ اس منصوبے نے نہ صرف ماحول کو پائیدار بنانے میں مدد دی بلکہ قیدیوں کے حالات زندگی میں بہتری بھی آئی اور انہیں متبادل تربیتی مواقع فراہم کیے گئے۔

UN Photo/Evan Schneider

اولوکیمی ایبیکونلے اقوام متحدہ کی نائب سربراہ سے ایوارڈ وصول کر رہی ہیں۔

وقار، حقوق اور پائیدار امن

اولوکیمی ایبیکونلے کی یہ خدمات اصلاحی نظام تک ہی محدود نہیں بلکہ وہ انسانی وقار، حقوق اور پائیدار امن کے ایک وسیع تر تصور کا مظہر ہیں۔

ان کا کہنا ہے کہ یہ اعزاز ان کے لیے اپنی خدمات کے اعتراف سے بڑھ کر اہمیت رکھتا ہے۔ یہ ان بے شمار خواتین کو شناخت اور مقام دینے کا موقع ہے جن کی آوازیں دبا دی گئیں اور جن کے خواب معاشرتی توقعات کی وجہ سے بکھر گئے۔

انہوں نے اس بات پر زور دیا ہے کہ قیدیوں کے ساتھ انسانی سلوک روا رکھنے کے لیے بین الاقوامی معیار کو اپنانا ضروری ہے اور دوران حراست صنفی ضروریات کو بھی نظر انداز نہیں کیا جانا چاہیے۔