الحمراء میں پنجاب انٹرنیشنل تھیٹر فیسٹیول کا آغاز (کل )سے ہوگا

جمعرات 9 اکتوبر 2025 18:55

لاہور (اُردو پوائنٹ اخبارتازہ ترین - این این آئی۔ 09 اکتوبر2025ء) الحمراء میں پنجاب ماس انٹر نیشنل تھیٹر فیسٹیول کا آغازکل مورخہ 10اکتوبر بروز جمعہ سے ہوگا۔ صوبائی وزیر اطلاعات وثقافت پنجاب عظمیٰ بخاری فیسٹیول کا افتتاح کریں گی۔فیسٹیول پنجاب کے ثقافتی حسن کے عکاسی کے ساتھ ساتھ دنیا کے سات ممالک کے آرٹسٹوں کے فن کی میزبانی کرئے گا۔حکومت پنجاب کا یہ اقدام ہمارے تھیٹر کی شناخت وبقاء کا ضامن ہوگاجس میں چھ روز تک مکالمہ کو پنپنے کا موقع فراہم کیا جا ئے گا۔

فیسٹیول حکومت پنجاب کا اپنی قدروں کے امین ہونے کاثبوت ہے جو اپنی تاریخ، تہذیب وتمدن اور ورثے کے تحفظ کے لئے ہمہ جہت برسرپیکار ہے۔فیسٹول میں دیس دیس کے آرٹسٹ پرفارم کرر ہے ہیں، جو’’ ڈرامہ‘‘ کے سنہری باب میں اضافہ ہوگا، جس میں تھیٹر کے نئے اسالیب ترتیب پائیں گے۔

(جاری ہے)

فیسٹیول میں پاکستان سمیت فرانس ، چین، ایران، یونان، جرمنی،ائرلینڈ،تیونس کے آرٹسٹ پرفارم کر رہے ہیں۔

پینل ڈسکشنز میںنئی سوچ وفکر نمو پائے گی ،تخلیقی شادابی کا دور دورا ہوگا۔ورکشاپس بھی فیسٹیول کا حصہ ہیں جو ہمارے شعور کی آواز کو تازگی بخشیں گی۔تہذیب وتمدن کی قدروں سے مالا مال یہ فیسٹیول 15اکتوبر تک جاری رہے گا جس میں بھرپور ادبی وثقافتی سرگرمیاں کی گہما گہمی ہوگی۔فیسٹیول سے دُنیا میں پاکستان کے ایک عظیم قوم ہونے کا بیانیہ مزید تقویت پائے گا۔