ایشین کپ کوالیفائر،اوٹس خان نے پنالٹی کک ضائع کردی، پاک-افغانستان مقابلہ بغیر کسی گول کے برابر، ایک ایک پوائنٹ مل گیا

جمعرات 9 اکتوبر 2025 21:36

اسلام آباد (اُردو پوائنٹ اخبارتازہ ترین - این این آئی۔ 09 اکتوبر2025ء) اے ایف سی ایشین کپ کوالیفائر میں پاکستان اور افغانستان کے درمیان میچ بغیر کسی گول کے برابر ہوگیا، دونوں ٹیموں نے ایک، ایک پوائنٹ حاصل کر لیا۔اسلام آباد کے جناح اسٹیڈیم میں کھیلے گئے میچ میں اوٹس خان کی جانب سے پنالٹی کک مس کرنے کے باعث پاکستان اور افغانستان کا میچ بغیر کسی گول کے برابر رہا، قومی ٹیم نے ایشین کپ 2027 کے تیسرے مرحلے کے کوالیفائنگ راؤنڈ میں اپنا پہلا پوائنٹ حاصل کر لیا ہے۔

(جاری ہے)

خیال رہے کہ افغان ٹیم ویزا مسائل کے باعث میچ سے صرف 24 گھنٹے قبل اسلام آباد پہنچی تھی، جس کی وجہ سے مہمان ٹیم کو تیاری کا زیادہ موقع بھی نہیں مل سکا تاہم دوران میچ میزبان ٹیم بھی متعدد مواقع ملنے کے باوجود اس کا فائدہ نہ اٹھا سکی، اوٹس خان کی جانب سے پنالٹی کک کا شاندار موقع کو ضائع کرنے سمیت کئی بہترین چانس گول میں بدل نہ سکے، حالانکہ پٴْرجوش تماشائیوں کی ایک بڑی تعداد اسٹیڈیم میں پاکستان ٹیم کی بھرپور حوصلہ افزائی کرتی دکھائی دی۔ڈرا کے بعد پاکستان اور افغانستان نے گروپ ‘ای’ میں اپنا پہلا پوائنٹ حاصل کر لیا، تاہم دونوں ٹیمیں 5 پوائنٹس کے فرق سے گروپ کی مشترکہ ٹاپ ٹیموں، شام اور میانمار سے پیچھے ہیں۔