پیرا کے 259 انفورسمنٹ افسران کو پرائس کنٹرول مجسٹریٹس کے اختیارات دیدئیے گئے

لاہور(اُردو پوائنٹ اخبارتازہ ترین - این این آئی۔ 09 اکتوبر2025ء) محکمہ داخلہ پنجاب میں کابینہ کمیٹی برائے امن و امان کا 37 واں اجلاس ہوا جس کی صدارت صوبائی وزیر صحت و چیئرمین خواجہ سلمان رفیق نے کی۔ اجلاس میں صوبائی وزرا سید عاشق حسین کرمانی اور بلال اکبر خان نے بھی شرکت کی۔ سیکرٹری داخلہ ڈاکٹر احمد جاوید قاضی اور قانون نافذ کرنے والے اداروں کے افسران نے اجلاس کو امن و امان کی مجموعی صورتحال بارے بریفنگ دی۔

کابینہ کمیٹی برائے امن و امان نے پنجاب انفورسمنٹ اینڈ ریگولیٹری اتھارٹی کے 259 انفورسمنٹ افسران کو پرائس کنٹرول مجسٹریٹس کے اختیارات دینے کی منظوری دی۔ اسی طرح میانوالی بارڈر چیک پوسٹس پر رینجرز کی تعیناتی کی مدت میں توسیع کی منظوری دی گئی۔ کابینہ کمیٹی برائے امن و امان نے ڈی جی خان بارڈر چیک پوسٹس پر 50 رضاکاروں کی تعیناتی کی بھی منظوری دی۔

(جاری ہے)

اجلاس میں رائٹ مینجمنٹ پولیس فورس کیلئے پیشہ ورانہ آلات کی خریداری کی منظوری دی گئی۔ اجلاس سے خطاب میں صوبائی وزیر صحت و چیرمین کابینہ کمیٹی خواجہ سلمان رفیق کا کہنا تھا کہ عوام کے جان و مال کا تحفظ ریاست کی اولین ترجیح ہے۔ جعلی دودھ کے نام پر معصوم بچوں کی زندگیوں سے کھیلنے والے مافیا سے آہنی ہاتھوں سے نمٹا جا رہا ہے۔ انہوں نے کہا کہ وزیراعلی پنجاب کی ہدایت پر پنجاب فوڈ اتھارٹی کی انفورسمنٹ ٹیموں نے جعلی دودھ بنانے والے 156 نیٹ ورکس کو پکڑا ہے جنہیں قرار واقعی سزا دلوائی جائے گی۔

انہوں نے کہا کہ پاکستان میں غیر قانونی طور پر مقیم غیر ملکی باشندوں کو باعزت طریقے واپس بھجوا رہے ہیں۔ خواجہ سلمان رفیق نے ہدایت دی کہ پیرا فورس کے جوان پیشہ ورانہ تربیت کی روشنی میں 100 فیصد میرٹ پر فیلڈ آپریشنز مکمل کریں۔ صوبائی وزیر زراعت سید عاشق حسین کرمانی نے کہا کہ پیرا فورس کے فیلڈ افسران کو باڈی کیمرے دیے جا رہے ہیں تاکہ تمام آپریشنز کی نگرانی یقینی بنائی جا سکے۔

صوبائی وزیر ٹرانسپورٹ بلال اکبر خان نے کہا کہ وزیراعلی پنجاب کی ہدایت کے مطابق قانون نافذ کرنے والے ادارے قیام امن کی خاطر دن رات مصروف عمل ہیں۔ سیکرٹری داخلہ پنجاب ڈاکٹر احمد جاوید قاضی نے اجلاس کو سول ڈیفنس پنجاب کے زریعے سموگ کے خاتمے کیلئے اٹھائے گئے اقدامات بارے بریفنگ دی۔ سیکرٹری داخلہ پنجاب کا کہنا تھا کہ نوجوان بڑی تعداد میں سول ڈیفنس ریزیلئنس کور میں بطور رضاکار شمولیت اختیار کر رہے ہیں۔

کابینہ کمیٹی برائے امن و امان کے اجلاس میں ایڈیشنل آئی جی پولیس طارق چوہان، سپیشل سیکرٹری داخلہ فضل الرحمان، ڈی آئی جی سپیشل برانچ، ڈی جی فوڈ اتھارٹی، ڈی جی پرائس کنٹرول، ڈی جی پیرا، ایڈیشنل سیکرٹری انٹرنل سکیورٹی، ایڈیشنل سیکرٹری پولیس اور ایڈیشنل سیکرٹری فارن نیشنل سکیورٹی نے شرکت کی۔ پنجاب بھر کے کمشنرز، ڈپٹی کمشنرز، آر پی اوز اور ڈی پی اوز نے ویڈیو لنک کے ذریعے اجلاس میں شرکت کی۔