بنوں،سی ٹی ڈی کا انٹیلی جنس بیسڈ آپریشن، 2 انتہائی مطلوب دہشت گرد ہلاک

مرنے والوں میں سی ٹی ڈی کے 4 اہلکاروں کی شہادت کا ماسٹر مائنڈ بھی شامل دونوں کا تعلق بنوں سے تھا، دہشت گردوں کے چند ساتھی تاریکی کا فائدہ اٹھاتے ہوئے فرار ہونے میں کامیاب ہوگئے

جمعہ 10 اکتوبر 2025 14:45

بنوں (اُردو پوائنٹ اخبارتازہ ترین - این این آئی۔ 10 اکتوبر2025ء) بنوں میں محکمہ انسداد دہشت گردی (سی ٹی ڈی)نے خفیہ اطلاع کی بنیاد پر کی گئی کارروائی کے دوران فائرنگ کے تبادلے میں 2 انتہائی مطلوب دہشت گردوں کو ہلاک کردیا۔محکمہ انسدادِ دہشت گردی خیبر پختونخوا کے مطابق ضلع بنوں میں ایک کامیاب انٹیلی جنس بیسڈ آپریشن کے دوران دو انتہائی مطلوب دہشت گردوں کو ہلاک کر دیا گیا ہے، مرنے والوں میں سی ٹی ڈی کے 4 اہلکاروں کی شہادت کا ماسٹر مائنڈ بھی شامل ہے۔

سی ٹی ڈی کو خفیہ اطلاع موصول ہوئی تھی کہ کالعدم تنظیم (فتنہ الخوارج)سے تعلق رکھنے والے دہشت گرد تھانہ ڈومیل کی حدود میں واقع کمپنی روڈ پر دہشت گردی کی ایک بڑی کارروائی کی منصوبہ بندی کر رہے ہیں، جس پر سی ٹی ڈی کی خصوصی ٹیم نے ضلعی پولیس کے ہمراہ فوری طور پر علاقے کا گھیرا ئوکیا۔

(جاری ہے)

آپریشن ٹیم کو دیکھتے ہی دہشت گردوں نے فرار ہونے کی کوشش کی اور اہلکاروں پر اندھا دھند فائرنگ شروع کر دی، سی ٹی ڈی اور پولیس کی جانب سے اپنی حفاظت اور دہشت گردوں کی گرفتاری کے لیے بھرپور جوابی کارروائی کی گئی، سی ٹی ڈی ٹیم اور دہشت گردوں کے درمیان تقریبا 25 منٹ تک فائرنگ کا تبادلہ جاری رہا۔

فائرنگ کا سلسلہ رکنے پر علاقے میں سرچ اینڈ کلیئرنس آپریشن کیا گیا تو 2 دہشت گرد ہلاک پائے گئے، جن کی شناخت راشدین عرف ملنگ یار اور خالد عثمان عرف عثمان کے ناموں سے ہوئی، دونوں کا تعلق بنوں سے تھا، دہشت گردوں کے چند ساتھی تاریکی کا فائدہ اٹھاتے ہوئے فرار ہونے میں کامیاب ہوگئے۔سی ٹی ڈی کے مطابق ہلاک دہشت گرد راشدین عرف ملنگ یار 30 اپریل 2025 کو سی ٹی ڈی بنوں کی ٹیم پر ہونے والے حملے کا ماسٹر مائنڈ تھا، جس میں اے ایس آئی بن یامین خان سمیت 4 اہلکار شہید اور ایک زخمی ہوا تھا، اس کے علاوہ یہ پولیس پوسٹ برگنتو اور سپینہ تنگی پر حملوں میں بھی ملوث تھا، جن میں کانسٹیبل میر صالح خان نے جامِ شہادت نوش کیا تھا۔

سی ٹی ڈی کے مطابق دہشت گرد خالد عثمان عرف عثمان 2023 کے دوران سی ٹی ڈی اور ضلعی پولیس پر متعدد حملوں اور ٹارگٹ کلنگ کی وارداتوں میں ملوث تھا، مذکورہ دہشت گرد نے نومبر 2023 میں پولیو ڈیوٹی پر تعینات کانسٹیبل امجد پر حملہ کر کے اس کو زخمی کیا تھا جبکہ اسی مہینے عبدالحمید حوالدار سی ٹی ڈی کو نشانہ بنا کر زخمی کیا تھا۔سی ٹی ڈی کے مطابق ہلاک دہشت گردوں کے قبضے سے 2 عدد کلاشنکوف، 6 میگزین، 23 رانڈز، دو دستی بم، دو موبائل فونز اور کالعدم ٹی ٹی پی کے دو کارڈز برآمد ہوئے ہیں، فرار ہونے والے دہشت گردوں کی گرفتاری کے لیے پولیس اور سی ٹی ڈی کی اضافی نفری نے علاقے میں سرچ آپریشن کا آغاز کر دیا ہے۔