مانسہرہ میں انسداد پولیو مہم کا دوسرا دن، ڈی پی او کا مختلف مقامات کا دورہ، سکیورٹی انتظامات کا جائزہ لیا

منگل 14 اکتوبر 2025 16:27

ایبٹ آباد (اُردو پوائنٹ اخبارتازہ ترین - اے پی پی۔ 14 اکتوبر2025ء) ڈی پی او مانسہرہ شفیع اللہ گنڈا پور نے ضلع بھر میں جاری انسدادِ پولیو مہم کے دوسرے روز مختلف مقامات کا دورہ کیا اور سکیورٹی انتظامات کا جائزہ لیا۔مانسہرہ پولیس کے مطابق ڈی پی او نے پولیو ٹیموں کے تحفظ اور جرائم کے خاتمے کے لئے سخت ہدایات جاری کیں۔ ڈی پی او مانسہرہ نے اس موقع پر کہا کہ پولیو ٹیموں کا تحفظ ہماری اولین ترجیح ہے۔

انہوں نے کہا کہ انسداد پولیو مہم کے پرامن اور کامیاب انعقاد کے لئے ضلع بھر میں سخت ترین سکیورٹی انتظامات کئے گئے ہیں، اس مقصد کے لئے 1993 پولیس افسران و اہلکار مختلف پولیو ٹیموں کے ہمراہ سکیورٹی کے فرائض سرانجام دے رہے ہیں تاکہ مہم کے دوران کسی قسم کا ناخوشگوار واقعہ پیش نہ آئے۔

(جاری ہے)

ڈی پی او مانسہرہ نے بعد ازاں تھانہ صدر مانسہرہ کا دورہ بھی کیا، جہاں ان کے ہمراہ ڈی ایس پی سٹی سمیت دیگر پولیس افسران و سٹاف موجود تھا۔

دورے کے دوران انہوں نے تھانہ کا ریکارڈ، مقدمات کی تفتیش اور علاقے میں جرائم کی شرح سے متعلق کرائم چارٹ کا تفصیلی جائزہ لیا۔ ڈی پی او مانسہرہ نے حوالات میں بند مختلف مقدمات کے ملزمان سے ملاقات کی اور ان سے پولیس کے رویے کے بارے میں دریافت کیا۔ انہوں نے تھانہ سٹاف کو ہدایت کی کہ زیر تفتیش مقدمات کی تفتیش جلد از جلد مکمل کی جائے، جرائم پیشہ عناصر کے خلاف کریک ڈاؤن تیز کیا جائے، منشیات فروشوں، راہزن گروہوں اور اشتہاری مجرمان کی گرفتاری کو یقینی بنایا جائے۔