شزا فاطمہ خواجہ کی ٹیکنالوجی، مصنوعی ذہانت اور سائبر سیکیورٹی کے عالمی ماہرین اور قائدین سے اعلیٰ سطحی ملاقاتیں

دبئی(اُردو پوائنٹ اخبارتازہ ترین - این این آئی۔ 14 اکتوبر2025ء) GITEX 2025کے موقع پر وفاقی وزیر برائے آئی ٹی و ٹیلی کمیونیکیشن شزا فاطمہ خواجہ نے ٹیکنالوجی، مصنوعی ذہانت اور سائبر سیکیورٹی کے عالمی ماہرین اور قائدین سے اعلیٰ سطحی ملاقاتیں کیں تاکہ ڈیجیٹل نیشن پاکستان وژن کے تحت پاکستان کے بین الاقوامی ڈیجیٹل تعاون اور انوویشن کو مزید مستحکم کیا جا سکے۔

وفاقی وزیر نے متحدہ عرب امارات کی سائبر سیکیورٹی کونسل کے سربراہ اور حکومتِ یو اے ای کے پرنسپل سائبر سیکیورٹی مشیر ڈاکٹر محمد الکویتی سے ملاقات کی، جس میں سائبر ریزیلنس کو مضبوط بنانے، کلاڈ گورننس کو فروغ دینے اور مصنوعی ذہانت و ڈیٹا انفراسٹرکچر میں تعاون بڑھانے پر گفتگو ہوئی۔ وزیر نے G42(گروپ 42)ابوظہبی، جو یو اے ای کا سب سے بڑا خود مختار کلاڈ پلیٹ فارم ہے، کے ساتھ ملاقات میں پاکستان کی Cloud First پالیسی کے تحت خود مختار کلاڈ انفراسٹرکچر، مصنوعی ذہانت کے اختراعی مراکز اور GPUپر مبنی قومی کمپیوٹ کیپسٹی پر اشتراک کے امکانات پر بات کی۔

(جاری ہے)

دونوں فریقین نے سائبر سیکیورٹی استعداد کار میں اضافے، اور مشترکہ تربیتی پروگرامز کے لیے فریم ورک تیار کرنے پر اتفاق کیا۔اس کے علاوہ وفاقی وزیر نے رومانیہ کی وزارتِ معیشت کے مشیر واسیلے کیٹالِن سے ملاقات کی، جس میں سائبر سیکیورٹی، مصنوعی ذہانت کی پالیسی و اخلاقیات، اور ڈیجیٹل گورننس میں تعاون کے مواقع پر تبادلہ خیال کیا گیا۔

دونوں ممالک نے پاکستان کے نیشنل سائبر ایمرجنسی ریسپانس ٹیم (PKCERT)اور رومانیہ کی نیشنل سائبر سیکیورٹی ڈائریکٹوریٹ (DNSC)کے درمیان ادارہ جاتی روابط قائم کرنے اور ای گورننس، انوویشن ایکو سسٹمز اور اکیڈمک ایکسچینج پروگرامز میں تعاون بڑھانے پر اتفاق کیا۔ایک علیحدہ ملاقات میں ڈاکٹر رامین حسنی، چیف ایگزیکٹو آفیسر و شریک بانی لیکوئڈ اے آئی (Liquid AI)جو MITسے جنم لینے والا تحقیقی ادارہ ہے، نے وفاقی وزیر کو اگلی نسل کی لیکویڈ نیورل نیٹ ورکس کے بارے میں آگاہ کیا۔

ملاقات میں مصنوعی ذہانت کی مہارتوں کی ترقی، اسٹارٹ اپ انکیوبیشن، اور تحقیقی اشتراک کے ذریعے پاکستان کی نیشنل اے آئی پالیسی 2025کے نفاذ میں تعاون پر بات ہوئی۔ اسی طرح مسٹر اینڈریو فیلڈمین، سی ای او Cerebras Systems کے ساتھ ملاقات میں مصنوعی ذہانت کے انفراسٹرکچر کی ترقی، تربیتی پروگرامز کے آغاز، اور مقامی اسٹارٹ اپس کو جدید کمپیوٹنگ سسٹمز تک رسائی فراہم کرنے پر بات چیت ہوئی۔یہ ملاقاتیں مصنوعی ذہانت، سائبر سیکیورٹی، اور کلاڈ انفراسٹرکچر میں عالمی شراکت داریوں کے فروغ کے کے عزم کی عکاس ہیں، جو وزیرِ اعظم میاں شہباز شریف کی قیادت میں ڈیجیٹل نیشن پاکستان کے وژن کو آگے بڑھانے کی جانب ایک اہم قدم ہی-