مذہبی جماعت کے پرتشدد مظاہرے پر 2716کارکنان گرفتار، زخمیوں کو ہسپتال سے چھٹی پر پکڑنے کا فیصلہ

مدارس کیخلاف بھی ایکشن کا فیصلہ، جیوفینسنگ مکمل، واٹس ایپ گروپس میں شامل افراد کے گرد بھی گھیرا تنگ

بدھ 15 اکتوبر 2025 21:20

لاہور (اُردو پوائنٹ اخبارتازہ ترین - این این آئی۔ 15 اکتوبر2025ء) لاہور میں ٹی ایل پی کے مظاہرے میں پرتشدد کاررائیوں کے الزام میں پولیس نے پنجاب بھر سے اب تک 2716 ملزمان کو گرفتار کرلیا ہے۔ذرائع کے مطابق لاہور سے 251، شیخوپورہ سے 178، منڈی بہائوالدین سے 190،راولپنڈی میں 155، فیصل آباد میں 143، گوجرانوالہ میں 135، سیالکوٹ میں 128، اٹک میں 121 پرتشدد مظاہرین کو گرفتار کیا گیا۔

پولیس کے مطابق ملزمان کے خلاف پنجاب بھر کے تھانوں میں 76مقدمات درج کئے ہیں، سب سے زیادہ 39مقدمات لاہور میں درج ہوئے جبکہ شیخوپورہ میں 8مقدمات درج ہوئے ہیں۔پنجاب بھر میں پرتشدد مظاہرین کے حملوں سے 250پولیس افسران اور اہلکار زخمی جبکہ ایک پولیس انسپکٹر شہید ہوا۔پولیس کے مطابق لاہور میں سب سے زیادہ 142افسران اور اہلکار زخمی ہوئے جبکہ شیخوپورہ میں 48پولیس آفسران اور اہلکار زخمی ہوئے۔

(جاری ہے)

دوسری جانب مرید کے میں پولیس کریک ڈان کے دوران احتجاج کرنے پر 253ملزمان کو گرفتار کرلیا گیا ہے جبکہ مزید گرفتاریوں کیلئے جیوفینسنگ مکمل ، کلوزسرکٹ فوٹیجز کا تجزیہ جاری ہے۔پولیس نے ہسپتالوں میں زیر علاج زخمی کارکنوں کو ڈسچارج ہونے پر گرفتار کرنے کا فیصلہ کیا ہے جبکہ املاک کی توڑ پھوڑ اور بلوے میں ملوث افراد کی نشاندہی کے لیے موبائل فرانزک بھی جاری ہے۔

رپورٹ کے مطابق پرتشدد احتجاج ، بلوے اور توڑ پھوڑ کرنے والے کارکنوں کے مدارس کی تفصیل بھی اکٹھی کرلی گئی جبکہ اعلی حکام کی ہدایات کے بعد مدارس کے خلاف بھی ایکشن متوقع ہے۔گرفتار ملزمان کے واٹس ایپ گروپس میں شامل افراد کی شناخت کا عمل شروع کردیا گیا ہے جبکہ پرتشدد کارروائیوں پر درج مقدمات میں دہشت گردی ، اقدام قتل ، ڈکیتی ، پولیس مقابلے کی دفعات شامل ہیں۔