ایشیا پیسیفک گول بال چیمپئن شپ 2025 کا اسلام آباد میں شاندار آغاز

جمعرات 16 اکتوبر 2025 21:30

اسلام آباد(اُردو پوائنٹ اخبارتازہ ترین - این این آئی۔ 16 اکتوبر2025ء) ایشیا پیسیفک گول بال چیمپئن شپ 2025 پاکستان اسپورٹس کمپلیکس اسلام آباد کے لیاقت جمنازیم میں جمعرات کو رنگا رنگ اور دلچسپ مقابلوں کے ساتھ شروع ہو گئی۔افتتاحی میچ میں ایران نے شاندار کارکردگی دکھاتے ہوئے سعودی عرب کو 6-4 سے شکست دی جبکہ تھائی لینڈ نے عراق کو 14-4 کے واضح مارجن سے ہرا دیا۔

(جاری ہے)

دفاعی چیمپئن چین نے اپنے اعزاز کے دفاع کا آغاز کامیابی سے کرتے ہوئے پاکستان کو 17-7 سے مات دی۔خواتین کے مقابلوں میں بھی چین کی ویمن ٹیم نے عمدہ کھیل پیش کرتے ہوئے پاکستانی ویمن ٹیم کو 13-3 سے شکست دی۔یہ بین الاقوامی ایونٹ پاکستان بلائنڈ اسپورٹس فیڈریشن کے زیراہتمام منعقد ہو رہا ہے، جس میں قازقستان، ایران، جاپان، تھائی لینڈ، پاکستان، سعودی عرب، آسٹریلیا، عراق، ازبکستان اور چین کی ٹیمیں حصہ لے رہی ہیں۔چمپئن شپ پہلی مرتبہ پاکستان میں منعقد کی جا رہی ہے اور اس میں مردوں اور خواتین دونوں کے مقابلے شامل ہیں۔