صدرآصف علی زرداری کا سانحہ کارساز کی برسی پر شہید بے نظیر بھٹو اور شہدائے جمہوریت کو خراج عقیدت

ہفتہ 18 اکتوبر 2025 16:46

اسلام آباد (اُردو پوائنٹ اخبارتازہ ترین - اے پی پی۔ 18 اکتوبر2025ء) صدر مملکت آصف علی زرداری نے سانحہ کارساز کے شہداء کی 18ویں برسی پر شہید بے نظیر بھٹو اور شہدائے جمہوریت کو خراج عقیدت پیش کیا ہے۔ ہفتہ کو ایوان صدر کے پریس ونگ سے جاری بیان کے مطابق صدر مملکت نے کہا کہ شہید بینظیر بھٹو اپنی جان کو لاحق خطرات کے باوجود اس دن وطن واپس آئیں۔ صدر مملکت نے کہا کہ وہ کارساز میں دہشت گردانہ حملے کے بعد بھی اپنے مشن پر قائم رہیں اور انہوں نے جمہوریت کی بحالی کے لیے اپنی جدوجہد جاری رکھی۔

(جاری ہے)

صدر مملکت نے اس کے بعد ہونے والے واقعات کو یاد کرتے ہوئے کہا کہ وہ زخمیوں سے ملنے اور سوگوار خاندانوں کو تسلی دینے کے لیے ہسپتالوں میں زخمیوں کی عیادت کی اور لواحقین سے اظہارِ ہمدردی کیا۔ صدر آصف علی زرداری نے کہا کہ اس دن سے لے کر ان کی شہادت تک ان کی زندگی اور قربانی جمہوریت اور امن کے لیے کھڑے ہونے والوں کے لیے رہنمائی اور طاقت کا باعث رہی ہے۔ انہوں نے کہا کہ قوم دہشت گردی اور انتہا پسندی کا مسلسل مقابلہ کر رہی ہے، سانحہ کارساز کے شہداء کی ہمت اور قربانیاں ایسی تمام قوتوں کو شکست دینے کے ہمارے عزم کو تقویت دیتی ہیں۔