اگرحکومت نے 4500 فی من ریٹ نہ دیا تو گندم کاشت نہیں کریں گے،کسان اتحاد پاکستان

کسان اپنی محنت کا جائز معاوضہ مانگتاہے، خیرات نہیں،چیئرمین کسان اتحارخالدحسین کابیان

پیر 20 اکتوبر 2025 20:30

اسلام آباد(اُردو پوائنٹ اخبارتازہ ترین - این این آئی۔ 20 اکتوبر2025ء) کسان اتحاد پاکستان کے چیئرمین خالد حسین نے اعلان کیاہے کہ اگرحکومت نے 4500روپے فی من ریٹ نہ دیاتوکسان گندم کاشت نہیں کریں گے۔اپنے بیان میں خالد حسین نے کہاکہ وزیراعظم نے گندم 3500روپے فی من خریدنے کا اعلان کیا ہے، گندم کا یہ ریٹ کسان کی لاگت سے کم ہے، کسان کی لاگت 4000سے 4500روپے فی من تک پہنچ چکی ہے، حکومت کسانوں سے مشاورت کیے بغیر فیصلے کر رہی ہے جو کسانوں کے مفاد میں نہیں۔

(جاری ہے)

انہوں نے کہا کہ کسان اپنی محنت کا جائز معاوضہ مانگتاہے، خیرات نہیں، سیلاب نے کسان کوپہلے ہی کمزور کیا، اب کم ریٹ دیکر مزید دباؤ ڈالا جا رہا ہے۔چیئرمین کسان اتحاد پاکستان نے اعلان کیا کہ اگرحکومت نے 4500روپے فی من ریٹ نہ دیاتوکسان گندم کاشت نہیں کریں گے۔انہوںنے کہاکہ گنے کی قیمت 350روپے فی من دی جارہی ہے اور چینی 175روپے فی کلوفروخت ہورہی ہے لہٰذا گنے کاریٹ کم ازکم 600روپے فی من مقررکیا جائے، کپاس کا ریٹ بھی کسان کے نقصان کاباعث ہے، 12000روپے فی من مقررکیا جائے۔