مختلف سیاسی جماعتوں سے تعلق رکھنے کارکنوں کی سردار رحیم سے ملاقات ،مسلم لیگ (فنکشنل)میں شمولیت کا اعلان

پیر 3 نومبر 2025 20:46

کراچی (اُردو پوائنٹ اخبارتازہ ترین - این این آئی۔ 03 نومبر2025ء) پاکستان مسلم لیگ (فنکشنل)سندھ کے سیکریٹری جنرل سردار عبدالرحیم سے فنکشنل لیگ ہاؤس کراچی میں مختلف سیاسی جماعتوں سے تعلق رکھنے والے سردار عارف ، جہان زیب انور گھوری والا ، امجد خان ، محمد شکیل ، محمد تنویر ، محمد اسماعیل ، انور خان ، فرحان خان ، غلام سرور، خواجہ نذیر حسن، فخرالخان ، زبیر اور دیگر رہنماں و کارکنان نے ملاقات کر کے پاکستان مسلم لیگ (فنکشنل)میں شمولیت اختیار کی۔

اس موقع پر سردار عبدالرحیم نے شمولیت اختیار کرنے والوں کو خوش آمدید کرتے ہوئے کہا کہ کراچی کے عوامی مسائل کے حل کے لیے فنکشنل لیگ ہر طبقے کے نمائندہ کرداروں کو ساتھ لے کر چل رہی ہے۔انہوں نے کہا کہ فنکشنل لیگ کے کارکنان پیر صاحب پگارا کی سربراہی اور سید صدرالدین شاہ راشدی کی سیاسی بصیرت میں متحد ہیں ۔

(جاری ہے)

پارٹی کے اندر کسی قسم کی گروپ بندی کسی صورت برداشت نہیں کی جائے گی۔

سردار عبدالرحیم نے کہا کہ عہدیداران و کارکنان ایک دوسرے کی عزت و احترام کرتے ہوئے پارٹی کو مزید مضبوط اور مستحکم بنائیں ، عوام سے مسلسل رابطے میں رہیں ۔انہوں نے واضح کیا کہ پارٹی میں بھتہ خوروں، منشیات فروشوں، اور زمینوں پر قبضہ کرنے والے مافیا کے لیے کوئی گنجائش نہیں ، ایسے عناصر کو کسی صورت برداشت نہیں کیا جائے گا ۔اس موقع پر فنکشنل لیگ ضلع کورنگی کے صدر چوہدری تنویر، ضلع ویسٹ کے صدر رضا خان اور دیگر رہنما بھی موجود تھے۔