ہوائوں کا رخ بتا رہا ہے ضمنی انتخابات میں سیاسی مخالفین کی ضمانتیں ضبط ہونے جارہی ہیں ‘ سیف کھوکھر

بدھ 5 نومبر 2025 12:16

لاہور(اُردو پوائنٹ اخبارتازہ ترین - این این آئی۔ 05 نومبر2025ء) پاکستان مسلم لیگ (ن) لاہور کے صدر سیف الملوک کھوکھر نے کہا ہے کہ پارٹی قائد محمد نواز شریف کی رہنمائی میں حکومت ملک کی معاشی طور پر ڈوبتی کشتی کو کنارے لگانے میں کامیاب ہو چکی ہے ،وزیر اعلیٰ پنجاب مریم نواز شریف نے عوام کی زندگیوں میں خوشحالی اور آسودگی لانے کیلئے جو عملی اقدامات اٹھائے ہیں وہ اپنی مثال آپ ہیں ، ہوائوں کا رخ بتا رہا ہے کہ ضمنی انتخابات میں سیاسی مخالفین کی ضمانتیں ضبط ہونے جارہی ہیں ۔

ان خیالات کا اظہار انہوں نے حلقہ این ای129میں ہونے والے ضمنی انتخاب کے سلسلہ میں منعقدہ کارنر میٹنگ سے خطاب کرتے ہوئے کیا ۔ اس موقع پر مسلم لیگ (ن) کے امیدوار حافظ میاں نعمان ، پارٹی کے مقامی رہنمائوں سمیت کارکنان کی کثیر تعداد موجود تھی ۔

(جاری ہے)

سیف الملوک کھوکھر نے کہا کہ مسلم لیگ (ن) نے ایسا امیدوار میدان میں اتارا ہے جس کا ماضی بے داغ اور جدوجہد سے بھرپور ہے ، حافظ میاں نعمان کو شریف برادران اور مسلم لیگ (ن) کے ساتھ کھڑا رہنے کی سزا بھی دی گئی لیکن اس کے باوجود وہ ثابت قدم رہے اور ان کے عزم میں لغزش نہیں آئی ۔

انہوں نے کہا کہ انتشاری ٹولہ عوامی مقبولیت کا دعویدار تو ہے لیکن ضمنی انتخابات میں انہیں امیدوار نہیں مل سکا ، اپنی سیاسی عزت بچانے کے لئے دوسروںکا کندھا استعمال کرنے کی کوشش کی جارہی ہے ۔ اس موقع پر انتخابی مہم کی حکمت عملی پر تفصیلی تبادلہ خیال کیا گیا اورکارکنوں کو ہدایت کی گئی کہ وہ مربوط اور منظم کوششوں کے ذریعے کامیابی کو یقینی بنائیں۔