سندھ زرعی یونیورسٹی کے طلبا نے ملتان میں اسٹارٹ اپس مقابلوں میں ملک کی 35 جامعات میں دوسری پوزیشن حاصل کرلی

جمعہ 13 فروری 2026 22:53

حیدرآباد (اُردو پوائنٹ اخبارتازہ ترین - اے پی پی۔ 13 فروری2026ء) سندھ زرعی یونیورسٹی ٹنڈوجام کے طلبہ نے اپنی یونیورسٹی کا نام روشن کرتے ہوئے محمد نواز شریف یونیورسٹی آف ایگریکلچر، ملتان میں منعقدہ چھٹے وینچر اسپارک 2026 کےقومی اسٹارٹ اپ مقابلے میں دوسری پوزیشن حاصل کی، یہ ایونٹ یونیورسٹی کے بزنس انکیوبیشن اور ایگریکلچرل اینٹرپرینیورشپ سینٹر کی جانب سے منعقد کیا گیا، جس نے نوجوان جدت پسندوں کو"خیالات کو پروان چڑھائیں اور مستقبل کو روشن کریں " کے موضوع کے تحت کاروباری آئیڈیاز پیش کرنے کا موقع فراہم کیا۔

اس مقابلے کا انعقاد ملتان چیمبر آف کامرس اینڈ انڈسٹری اور اسٹیٹ بینک آف پاکستان کے تعاون سے کیا گیا، جس کا مقصد ملک بھر کی اکیڈمیا، صنعت اور مالیاتی اداروں کے درمیان تعلقات کو مضبوط کرنا تھا۔

(جاری ہے)

ان مقابلوں میں ملک کی 35 سے زائد پبلک یونیورسٹیوں کے طلبہ نے حصہ لیا۔ جس میں تمام جامعات کے 700 سے زائد کاروباری آئیڈیاز جمع ہوئے، جن میں سے صرف 100 پروجیکٹس کو فائنل کے لیے شارٹ لسٹ کیا گیا۔

ان میں سندھ زرعی یونیورسٹی ٹنڈوجام کے 4 اسٹارٹ اپس شامل تھے، جس میں ڈی وی ایم طلبہ کے گروپ کے شاندار اسٹارٹ اپس نے ان تمام جامعات میں دوسری پوزیشن حاصل کی اور 75 ہزار روپے نقد انعام جیتا، فاتح ٹیم کی قیادت زارشت نعیم نے کی، جبکہ ٹیم کے اراکین شیر محمد اور سمیرا روہان تھے۔ اس موقع پر منعقدہ تقریب میں محمد نواز شریف یونیورسٹی آف ایگریکلچر، ملتان کے وائس چانسلر پروفیسر ڈاکٹر آصف علی نے یونیورسٹی آف ایگریکلچر فیصل آباد کے پروفیسر ڈاکٹر ذوالفقار علی، یونیورسٹی آف ایگریکلچر سوات کے وائیس چانسلر پروفیسر ڈاکٹر داؤد جان، اور ڈیڑہ غازی خان یونیورسٹی کے وائیس چانسلر پروفیسر ڈاکٹر اشفاق احمد چٹھہ نے کامیاب طلبہ میں انعامات تقسیم کئے، دوسری جانب سندھ زرعی یونیورسٹی کے وائس چانسلر پروفیسر انجینئر ڈاکٹر الطاف علی سیال نے طلبہ اور فیکلٹی کے اراکین کو مبارکباد دی اور ان کی محنت اور جدت کو سراہا۔

انہوں نے کہا کہ یہ کامیابیاں یونیورسٹی کی کاروباری جدت، تحقیقی کاروبار اور طلبہ کی قیادت میں جدت کے فروغ کے عزم کی عکاسی کرتی ہیں۔