وفاقی آئینی عدالت میں محمود اچکزئی کی اپوزیشن لیڈر تعیناتی چیلنج

پیر 23 فروری 2026 19:10

اسلام آباد (اُردو پوائنٹ اخبارتازہ ترین - اے پی پی۔ 23 فروری2026ء) پی ٹی آئی کے بانی رکن اکبر ایس بابر نے وفاقی آئینی عدالت میں درخواست دائر کرتے ہوئے محمود خان اچکزئی کی بطور اپوزیشن لیڈر قومی اسمبلی تعیناتی کو چیلنج کر دیا ہے۔ درخواست شوکت عزیز صدیقی کے ذریعے دائر کی گئی۔

(جاری ہے)

درخواست میں سوال اٹھایا گیا ہے کہ کیا کوئی سزا یافتہ اور نااہل شخص جیل سے بیٹھ کر پارلیمانی عمل کو کنٹرول کر سکتا ہے؟ ماضی میں استعفوں کی تصدیق کے لئے سپیکر ارکان کو ذاتی حیثیت میں طلب کرتے رہے ہیں لیکن اس بار طریقہ کار کو نظر انداز کیا گیا۔

مزید کہا گیا کہ قائد حزب اختلاف کا عہدہ جوڈیشل کمیشن اور الیکشن کمیشن کی اہم تقرریوں میں کلیدی کردار ادا کرتا ہے اور دستخطوں کی تصدیق کے بغیر جاری کردہ نوٹیفکیشن صرف غلطی نہیں بلکہ آئین کی خلاف ورزی ہے۔ درخواست میں عدالت سے استدعا کی گئی ہے کہ محمود خان اچکزئی کی تقرری کا نوٹیفکیشن کالعدم قرار دیا جائے اور کیس کے حتمی فیصلے تک نوٹیفیکیشن معطل کیا جائے۔