/ماریہ شہباز کا کیس میں ایک کم عمر بچی کے بنیادی انسانی حقوق اور قانونی تحفظ کو نظر انداز کیا گیا ہے، انیل غوری

ہفتہ 4 اپریل 2026 01:40

کوئٹہ (اُردو پوائنٹ اخبارتازہ ترین - آن لائن۔ 04 اپریل2026ء) اقلیتی فورم پاکستان بلوچستان کے صوبائی صدر انیل غوری، صوبائی سیکرٹری جنرل جوئیل بیسٹن، ڈپٹی جنرل سیکرٹری شہباز گل، جوائنٹ سیکرٹری عرفان اسلم، ضلع کوئٹہ کے صدر روہیل ارسلان، ضلع کوئٹہ کی سیکرٹری جنرل شحرس اشرف، سینئر نائب صدر عمیر اعجاز، سیکرٹری اطلاعات ہینری ولیم اور ڈپٹی سیکرٹری جنرل عادل بھٹی نے اپنے مشترکہ بیان میں آئینی عدالت کے حالیہ فیصلے کی شدید الفاظ میں مذمت کرتے ہوئے کہا ہے کہ یہ فیصلہ نہ صرف انصاف کے تقاضوں کے منافی ہے بلکہ اس سے ملک میں بسنے والی اقلیتی برادری خصوصا مسیحی قوم میں شدید بے چینی، غم و غصہ اور مایوسی کی لہر دوڑ گئی ہے۔

انہوں نے کہا کہ ماریہ شہباز کا کیس ایک حساس نوعیت کا معاملہ ہے جس میں ایک کم عمر بچی کے بنیادی انسانی حقوق اور قانونی تحفظ کو نظر انداز کیا گیا ہے۔

(جاری ہے)

پاکستان کا آئین اور ملکی قوانین واضح طور پر کم عمری کی شادی کی اجازت نہیں دیتے، اس کے باوجود اس فیصلے نے کئی سوالات کو جنم دیا ہے جو کہ فوری توجہ کے متقاضی ہیں۔رہنماں نے مزید کہا کہ اقلیتی برادری نے ہمیشہ پاکستان کی سلامتی، استحکام اور خوشحالی میں بھرپور کردار ادا کیا ہے اور ہر مشکل گھڑی میں ملک کے ساتھ کھڑی رہی ہے۔

ہم نے ہمیشہ پاکستان کی عدالتوں اور اداروں کا احترام کیا ہے، تاہم حالیہ فیصلے نے اقلیتی برادری خصوصا کرسچن کمیونٹی کو شدید مایوسی سے دوچار کیا ہے۔انہوں نے اس بات پر زور دیا کہ ماریہ شہباز اور اس کے اہل خانہ کو فوری اور منصفانہ انصاف فراہم کیا جائے، کیونکہ انصاف میں تاخیر انصاف سے انکار کے مترادف ہے۔ انہوں نے حکومت پاکستان، متعلقہ اداروں اور انسانی حقوق کی تنظیموں سے پرزور اپیل کی کہ اس فیصلے پر فوری نظر ثانی کی جائے اور ایسے اقدامات کیے جائیں جو نہ صرف متاثرہ خاندان کو انصاف فراہم کریں بلکہ مستقبل میں اس طرح کے واقعات کی روک تھام بھی ممکن بنائیں۔

بیان میں مزید کہا گیا کہ اقلیتی حقوق کا تحفظ ریاست کی آئینی و اخلاقی ذمہ داری ہے اور کسی بھی صورت میں اس سے غفلت برداشت نہیں کی جا سکتی۔ اگر اقلیتوں کو انصاف اور تحفظ فراہم نہ کیا گیا تو اس کے منفی اثرات قومی یکجہتی اور سماجی ہم آہنگی پر مرتب ہوں گے۔آخر میں رہنماں نے واضح کیا کہ وہ ماریہ شہباز اور اس کے خاندان کے ساتھ مکمل یکجہتی کا اظہار کرتے ہیں اور انصاف کے حصول تک اپنی آواز بلند کرتے رہیں گی