مسلم لیگ فنکشنل کا سندھ بھر میں ڈویژن سطح پر پارٹی عہدیداران کا انتخاب عمل میں لانے کا فیصلہ

جمعہ 17 اپریل 2026 19:33

کراچی (اُردو پوائنٹ اخبارتازہ ترین - این این آئی۔ 17 اپریل2026ء) پاکستان مسلم لیگ فنکشنل سندھ کے صدر سید صدرالدین شاہ راشدی کی مشاورت سے یہ فیصلہ کیا گیا ہے کہ سندھ بھر میں ڈویژن سطح پر پارٹی عہدیداران کا انتخاب عمل میں لایا جائے گا۔ اسی سلسلے میں پاکستان مسلم لیگ فنکشنل کراچی ڈویژن کا اہم اجلاس فنکشنل لیگ ہاس کلفٹن میں منعقد ہوا، جس کی صدارت پارٹی کے صوبائی سیکریٹری جنرل سردار عبدالرحیم نے کی۔

اجلاس میں کراچی کے ساتوں اضلاع کے صدور ، جنرل سیکریٹریز ، مختلف ونگز کے ذمہ داران اور سینیئر رہنماں نے بھرپور شرکت کی۔ تفصیلی مشاورت اور باہمی اتفاق رائے کے بعد معروف قانون دان ایڈووکیٹ انور عظیم کو پاکستان مسلم لیگ فنکشنل کراچی ڈویژن کا صدر منتخب کر لیا گیا۔

(جاری ہے)

جبکہ دیگر عہدیداران اور کمیٹی اراکین کے ناموں کا اعلان مشورے کے ساتھ جلد کیا جائے گا۔

اس موقع پر سردار عبدالرحیم نے ایڈووکیٹ انور عظیم کو صدر منتخب ہونے پر مبارکباد پیش کرتے ہوئے کہا کہ ہمیں امید ہے کہ وہ کراچی میں پارٹی کو مزید منظم، فعال اور مضبوط بنانے میں کلیدی کردار ادا کریں گے۔ انہوں نے کہا کہ پارٹی کارکنان عوام سے قریبی رابطہ رکھیں اور پیر صاحب پگارا کا پیغام گھر گھر پہنچا کر زیادہ سے زیادہ لوگوں کو فنکشنل لیگ میں شمولیت کی دعوت دیں۔

سردار عبدالرحیم نے کراچی میں امن و امان کی بگڑتی صورتحال پر تشویش کا اظہار کرتے ہوئے کہا کہ آج شہر میں کوئی بھی شہری اسٹریٹ کرائم سے محفوظ نہیں۔ انہوں نے کہا کہ ایک منظم سازش کے تحت نوجوانوں کو منشیات، آئس، نشہ آور چھالیہ اور گٹکے جیسی لعنتوں میں مبتلا کیا جا رہا ہے، جو کھلے عام فروخت ہو رہی ہیں۔ انہوں نے مطالبہ کیا کہ نوجوانوں کے لیے روزگار کے مواقع فراہم کیے جائیں، ترقیاتی کاموں کو تیز کیا جائے، اور صحت و تعلیم کے شعبوں کو بہتر بنایا جائے۔انہوں نے مزید کہا کہ پارٹی کو مزید مستحکم اور فعال بنانے کے لیے سندھ کے دیگر ڈویژنز میں بھی جلد عہدیداران کا انتخاب مکمل کیا جائے گا۔