مسلم لیگ( ق)سندھ کی تقریب، تنظیمی سرگرمیوں میں تیزی لانے کا اعلان

پیر 20 اپریل 2026 19:46

کراچی (اُردو پوائنٹ اخبارتازہ ترین - این این آئی۔ 20 اپریل2026ء) پاکستان مسلم لیگ (ق)کے مرکزی سیکرٹری جنرل اور سی ایم سندھ کے اسپیشل ایڈوائزر طارق حسن نے مرکزی قائدین چوہدری شجاعت حسین، چوہدری سالک حسین اور چوہدری شافع حسین کا تہہ دل سے شکریہ ادا کرتے ہوئے کہا کہ انہوں نے ہمیشہ محبت، اعتماد اور عزت سے نوازا۔ انہوں نے اس موقع پر سندھ کے صدر سرائے نیاز حسین خاصخیلی کو وفاقی منسٹر اوورسیز کا کوآرڈینیٹر سندھ ریجن مقرر ہونے پر دلی مبارکباد بھی پیش کی۔

طارق حسن نے اعلان کیا کہ آرگنائزنگ کمیٹی کو ایک ماہ کے اندر تنظیم سازی مکمل کرنے کی ہدایت دی گئی ہے ۔ اس سلسلے میں سندھ کے جنرل سیکرٹری کنور ارشد علی خان کو بطور چیف آرگنائزر کراچی ڈیژن کی ذمہ داریاں سونپی گئی ہیں۔

(جاری ہے)

انہوں نے آئندہ انتخابات کی تیاریوں پر زور دیتے ہوئے کہا کہ پارٹی کو مضبوط اور منظم بنانے کے لیے عملی اقدامات کیے جائیں گے۔

انہوں نے قائد چوہدری شجاعت حسین کا پیغام بھی کارکنان تک پہنچایا کہ پارٹی کے پرانے ورکرز، جو کسی وجہ سے اس وقت ساتھ نہیں ہیں، یا ان کی اولاد کو ترجیحی بنیادوں پر مواقع اور روزگار فراہم کیے جائیں گے تاکہ پارٹی کو مزید مستحکم کیا جا سکے۔اس موقع پر سندھ کے صدر سرائے نیاز حسین خاصخیلی نے بھی مرکزی سیکرٹری جنرل طارق حسن، چوہدری شجاعت حسین، وفاقی منسٹر اوورسیز چوہدری سالک حسین اور چوہدری شافع حسین کا شکریہ ادا کیا۔

تقریب میں انتہائی جوش و خروش دیکھنے میں آیا، کارکنان کی بڑی تعداد کے باعث بیٹھنے کی جگہ بھی کم پڑ گئی۔ آخر میں کیک کاٹا گیا اور خوشی کا اظہار کیا گیا۔ کراچی ڈیژن کے عہدیداران ورکرز نے بھرپور شرکت کی اور قائدین کا شکریہ ادا کیا۔ صوبائی صدر سرائے نیاز خاصخیلی کو وفاقی وزیر کا کوآرڈینیٹر برائے سندھ مقرر ہونے پر مبارکباد پیش کی جبکہ ٹھٹھہ، حیدرآباد، کے صدور نے خصوصی شرکت کی۔

تقریب کے دوران کارکنان نے پرجوش انداز میں طارق حسن، سرائے نیاز حسین خاصخیلی اور کنور ارشد کا استقبال کیا، انہیں خراجِ تحسین پیش کیا اور مبارکباد دی۔ اس موقع پر مرکزی ایڈیشنل سیکریٹری انفارمیشن شاہد عباسی، قائم مقام انفارمیشن سیکریٹری سندھ کامران صدیقی، لیڈیز ونگ کراچی کے صدر ریحانہ رسول نیاظہار خیال کیا۔