سات ماہ میں 2.2ارب کی 21.1 ٹن منشیات کی فروخت کو ناکام بنایا گیا‘بریگیڈئیر مظہر اقبال

منشیات کے خلاف لڑائی ایک جنگ ہے جسے پوری قوم کو لڑنا ہے‘ ڈی جی پنجاب کائونٹر نارکوٹکس فورس

منگل 28 اپریل 2026 19:10

لاہور(اُردو پوائنٹ اخبارتازہ ترین - این این آئی۔ 28 اپریل2026ء) ڈائریکٹر جنرل پنجاب کائونٹر نارکوٹکس فورس بریگیڈیر مظہر اقبال نے کہا ہے کہ گزشتہ سات ماہ میں 1090 سے زائد آپریشنز میں 21.1 ٹن منشیات کی فروخت کو ناکام بنایا گیا جس کی کل مالیت کا تخمینہ 2.2ارب روپے ہے۔صوبے سے منشیات فروشی کے خاتمے کے لیے پنجاب کائونٹر نارکوٹکس فورس کی آگاہی مہم کے سلسلہ میں فاطمہ جناح میڈیکل یونیورسٹی لاہور کے دورہ میں بریگیڈئیر مظہر اقبال نے وائس چانسلر پروفیسر خالد مسعود سے ملاقات اور فیکلٹی ممبران کے ساتھ خصوصی نشست کے بعد طلبہ ساتھ مکالماتی سیشن میں حصہ لیا۔

بریگیڈئیر مظہر اقبال نے بتایا کہ پنجاب کانٹر نارکوٹکس فورس صوبے میں منشیات کی سپلائی چین کو توڑنے کے لیے سر گرم عمل ہے اور بیک وقت پنجاب کے 9 ڈویژنز اور 41 اضلاع میں خدمات سر انجام دے رہی ہے۔

(جاری ہے)

انہوںنے کہا کہ جنگیںصرف ادارے نہیں بلکہ اقوام لڑتی ہیں منشیات کے خلاف یہ لڑائی بھی ایک جنگ ہے جسے پوری قوم کو لڑنا ہے۔ اس ضمن میں طلبہ اور تعلیمی اداروں کا کردار کلیدی اہمیت کا حامل ہے۔

نوجوانوں میں منشیات کے بڑھتے ہوئے استعمال کو روکنے کے لیے انہیںاس کے نقصانات اور معاشرے پر اثرات سے آگاہ کرنا ضروری ہے۔ بے چینی ، مایوسی اور ذہنی دبا سے نجات کے لیے ڈرگز کا استعمال حل نہیں ہے ۔ طلبہ قرآن کی تلاوت اور دینی تعلیمات کی استفادہ کریں۔ اپنے اداروں میں منشیات فروشی اور اس سے متعلقہ سرگرمیوں کی ہیلپ لائن 1012پر اطلاع کریں تاکہ ان کا سد باب کیا جا سکے۔

انہوں نے یقین دلایا کہ ہیلپ لائن پر اطلاع دینے والے کی شناخت کو صیغہ راز میں رکھا جائے گا۔ طلبہ کی جانب سے ایک سوال کے جواب میں ڈی جی سی این ایف نے بتایا کہ ویپ اور آ ئس باررز کے قیام پر کنٹرول کے لیے وفاقی سطح پر پالیسی سازی کی جا رہی ہے ۔پنجاب میں منشیات فروشوں کے خاتمے کے لیے سخت قانون سازی کی گئی ہے ۔ منشیات فروشوں کے خلاف بلا امتیاز کاروائیاں کی جارہی ہیں ۔