صوبائی وزیر صحت سندھ ڈاکٹر عذرا فضل پیچوہو نے عالمی ہفتہ برائے حفاظتی ٹیکہ جات کا افتتاح کر دیا

کراچی (اُردو پوائنٹ اخبارتازہ ترین - این این آئی۔ 28 اپریل2026ء) صوبائی وزیر برائے صحت و بہبودِ آبادی سندھ ڈاکٹر عذرا فضل پیچوہو نے ایس ایم بی فاطمہ جناح گورنمنٹ اسکول میں عالمی ہفتہ برائے حفاظتی ٹیکہ جات 2026 کا باضابطہ افتتاح کیا۔ صوبائی سطح پر منعقدہ اس تقریب میں سرکاری حکام، عالمی شراکت داروں اور سول سوسائٹی کے نمائندوں نے شرکت کی، جو سندھ کے تمام اضلاع میں زندگی بچانے والی ویکسین کی خدمات کو تیز کرنے کے عزم کا آغاز ہے۔

اپنے خطاب میں ڈاکٹر عذرا پیچوہو نے اس بات پر زور دیا کہ حفاظتی ٹیکہ جات محض ایک طبی ضرورت نہیں بلکہ ہر بچے کا بنیادی حق ہے۔ویکسین معذوری اور موت کے خلاف ہمارا سب سے طاقتور ڈھال ہے۔ ہمارا مشن یہ یقینی بنانا ہے کہ سندھ کا ہر بچہ چاہے وہ کراچی کی بلند و بالا عمارتوں میں ہو یا تھرپارکر کے کسی دور دراز گاں میں بیماریوں سے محفوظ رہے۔

(جاری ہے)

وزیرِ صحت کی قیادت میں ایمونائزیشن کے توسیعی پروگرام سندھ نے ریکارڈ ساز پیش رفت دکھائی ہے۔

باقاعدہ حفاظتی ٹیکہ جات مجموعی کوریج 80 فیصد کی تاریخی سطح تک پہنچ گئی۔ پینٹا1-کی کوریج 95 فیصد سے تجاوز کر گئی، جو کہ مہم کے آغاز میں والدین کے بھرپور اعتماد کی عکاسی ہے۔بی سی جی کی کوریج 90 فیصد سے زائد ہو گئی۔ صوبے سندھ کی 91 فیصد آبادی تک ویکسینیشن کی سہولیات براہِ راست پہنچ چکی ہیں۔ڈاکٹر عذرا پیچوہو نے بتایا کہ حکومتِ سندھ نے ان بچوں تک پہنچنے کے لیے جدید طریقے اپنائے ہیں جو اب تک ایک بھی خوراک حاصل نہیں کر سکے پیدائشی خوراک بڑے ہسپتالوں میں پیدائش کے فوری بعد ویکسین کی فراہمی یقینی بنائی جا رہی ہے۔

ملازمت پیشہ والدین کی سہولت کے لیے ویکسینیشن سینٹرز اب شام اور ویک اینڈ پر بھی خدمات فراہم کر رہے ہیں ویکسین کے ساتھ ساتھ بنیادی غذائیت پر بھی توجہ دی جا رہی ہے تاکہ بچوں کی نشوونما مکمل طور پر صحت مند ہو۔صوبائی وزیرِ صحت نے اس موقع پر 11 مئی سے 24 مئی 2026 تک چلائی جانے والی اہم (پولیو بوسٹر مہم ) کا بھی اعلان کیا۔ انہوں نے اسکولوں، کمیونٹی رہنماں اور والدین سے اپیل کی کہ وہ اس مہم کو کامیاب بنانے کے لیے اسی جوش و خروش کا مظاہرہ کریں جو عالمی ہفتہ برائے حفاظتی ٹیکہ جات کے دوران نظر آ رہا ہے۔

ڈاکٹر عذرا پیچوہو نے نظامِ تعلیم میں صحت کی آگاہی شامل کرنے پر شہزاد رائے اور زندگی ٹرسٹ کا شکریہ ادا کیا۔ انہوں نے بین الاقوامی شراکت داروں اور ای او سی سندھ کی فیلڈ ٹیموں کی انتھک محنت کو بھی سراہا۔تقریب کے اختتام پر وزیرِ صحت نے عوام کو یاد دلایا کہ حکومت یہ تمام ویکسین مفت فراہم کر رہی ہے، لیکن اصل ذمہ داری سرپرستوں پر عائد ہوتی ہے۔ انہوں نے کہا میں ہر والدین اور استاد سے اپیل کرتی ہوں کہ وہ 'ویکسین چیمپئن' بنیں۔ ہم سب مل کر اپنی سرزمین سے خسرہ، پولیو اور نمونیا کا خاتمہ کر سکتے ہیں۔