معرکہ حق میں کامیابی سے پاکستان دنیا میں امن کا علمبردار بن کر ابھرا ہے،عطاء اللہ تارڑ

ہفتہ 2 مئی 2026 17:55

-اسلام آباد(اُردو پوائنٹ اخبارتازہ ترین - آن لائن۔ 02 مئی2026ء) وفاقی وزیر اطلاعات عطاء اللہ تارڑنے کہا ہے کہ معرکہ حق میں کامیابی سے پاکستان دنیا میں امن کا علمبردار بن کر ابھرا ہے،دنیا میں لوگ پاکستان سے اپنے تعلق پر فخر محسوس کرتے ہیں، بھارت دہشت گردی کو فروغ دیتا ہے اور پاکستان دہشت گردی کا مقابلہ کرتا ہے‘وزارت اطلاعات اور آئی ایس پی آر نے ٹیم ورک کے نتیجے میں بیانیہ کی جنگ میں کامیابی حاصل کی۔

یہاں ایک تقریب سے خطاب کرتے ہوئے وفاقی وزیر اطلاعات عطاء اللہ تارڑنے کہا کہ معرکہ حق میں کامیابی سے پاکستان دنیا میں امن کا علمبردار بن کر ابھرا ہے، معرکہ حق سفارتی سطح پر بھی لڑا گیا اور پاکستان کامیابی سے ہمکنار ہوا، دنیا میں لوگ پاکستان سے اپنے تعلق پر فخر محسوس کرتے ہیں۔

(جاری ہے)

عطاء اللہ تارڑنے کہا کہ پی ایم اے کاکول میں وزیراعظم شہباز شریف نے پہلگام واقعہ کی شفاف اور غیر جانبدارانہ تحقیقات کا مطالبہ کیا جس پر کوئی جواب نہیں آیا،پاکستان نے ایک ذمہ دار ریاست کے طور پر پہلگام واقعہ پر تشویش کا اظہار کیا، پاکستان نے پہلگام واقعہ کے لئے شواہد مانگے تو بھارت کے پاس خاموشی کے سوا کچھ نہ تھا، وزیر اطلاعات نے کہا کہ پاکستان کا ہر طبقہ دہشت گردی کے خلاف جنگ میں قربانیاں دے رہا ہے،اے پی ایس کا واقعہ ہو یا جعفر ایکسپریس کا واقعہ، ہمارا ہر طبقہ دہشت گردی کی جنگ میں قربانیاں دے رہا ہے، دوسری جانب ایک ایسا ملک ہے جس کا کبھی کلبھوشن پکڑا جاتا ہے اور کبھی ابھی نندن، کلبھوشن یادیو کو رنگے ہاتھوں گرفتار کیا گیا۔

انہوںنے کہا کہ بھارت دہشت گردی کو فروغ دیتا ہے اور پاکستان دہشت گردی کا مقابلہ کرتا ہے، انٹرنیشنل فورمز پر پاکستان کا بیانیہ بھرپور طریقے سے پیش کیا۔ وزیر اطلاعات نے کہا کہ وزارت اطلاعات اور آئی ایس پی آر نے ٹیم ورک کے نتیجے میں بیانیہ کی جنگ میں کامیابی حاصل کی، معرکہ حق کی تاریخ میں سوشل میڈیا صارفین کو بھی ہمیشہ یاد رکھا جائے گا، ہماری نوجوان نسل نے بھارتی میڈیا کا مکروہ چہرہ پوری دنیا کو دکھایا، بیانیہ کی جنگ میں پاکستان کی عوام نے دنیا کو بتا دیا کہ پاکستان امن کا خواہاں ہے، بھارت نے ہمارے یو ٹیوب چینلز بند کئے تو ہم نے اپنے ملی نغمے اور قومی ترانے بھارت کے اندر یوٹیوب کے چینلز پر چلا کر دکھائے۔