جے یو آئی کے سربراہ مولانا فضل الرحمن 14مئی کو سندھ کا دورہ کریں گے

منگل 5 مئی 2026 21:10

جیکب آباد (اُردو پوائنٹ اخبارتازہ ترین - این این آئی۔ 05 مئی2026ء) جے یو آئی کے سربراہ مولانا فضل الرحمن 14مئی کو سندھ کا دورہ کریں گے۔

(جاری ہے)

تفصیلات کے مطابق جے یو آئی سندھ کے سیکریٹری جنرل علامہ راشد محمود سومرو نے کہا ہے کہ جے یو آئی کے سربراہ مولانا فضل الرحمن 14 مئی کو سندھ کا دورہ کریں گے جہاں وہ کراچی میں منعقد ہونے والی ایک عظیم الشان وحدت امت کانفرنس سے خطاب کریں گے انہوں نے کہا کہ یہ کانفرنس موجودہ حالات میں امت مسلمہ کے اتحاد و یکجہتی کے فروغ کے لیے نہایت اہم ثابت ہوگی اور اس میں مختلف مکاتب فکر کے علماء و رہنما شرکت کریں گے ، دوسری جانب جے یو آئی سندھ کے پریس سیکریٹری ڈاکٹر اے جی انصاری کی جانب سے جاری کردہ پریس ریلیز کے مطابق جے یو آئی سندھ کے امیر مولانا عبدالقیوم ہالیجوی، سید سراج احمد شاہ امروٹی، قاری محمد عثمان، سمیع الحق سواتی اور سلیم سندھی سمیت دیگر نے جے یو آئی کے سابق ایم پی اے مولانا محمد ادریس شہید پر ہونے والے قاتلانہ حملے کی شدید مذمت کی ہے ، رہنماؤں نے اپنے مشترکہ بیان میں کہا کہ علماء کرام اور جے یو آئی کے کارکنان کو نشانہ بنانا قابل مذمت اور ناقابل برداشت ہے ، انہوں نے مطالبہ کیا کہ واقعے میں ملوث عناصر کو فوری طور پر گرفتار کرکے قانون کے کٹہرے میں لایا جائے ، ان کا کہنا تھا کہ ایسے واقعات نہ صرف جمہوری اقدار بلکہ معاشرتی امن کے لیے بھی سنگین خطرہ ہیں، انہوں نے مزید کہا کہ جے یو آئی اپنے کارکنان کے تحفظ کے لیے ہر ممکن اقدام کرے گی اور ظلم و زیادتی کے خلاف آواز بلند کرتی رہے گی، رہنماؤں کا کہنا تھا کہ وقت آنے پر ان واقعات کا مکمل حساب لیا جائے گا اور انصاف کی فراہمی تک جدوجہد جاری رکھی جائے گی۔