مشیر وزیراعظم زاہد مغل پاکستان اور آزاد جموں و کشمیر کا کامیاب دورہ مکمل کرکے برطانیہ واپس روانہ

جمعرات 7 مئی 2026 15:03

لندن(اُردو پوائنٹ اخبارتازہ ترین - این این آئی۔ 07 مئی2026ء) مشیر وزیراعظم آزاد جموں و کشمیر،تمغہ امتیاز ومرکزی سیکرٹری اطلاعات پاکستان پیپلز پارٹی برطانیہ زاہد مغل پاکستان اور آزاد جموں و کشمیر کا کامیاب دورہ مکمل کرکے برطانیہ واپس روانہ ہو گئے۔ وہ گزشتہ روز بینظیر بھٹو انٹرنیشنل ایئرپورٹ اسلام آباد سے لندن کے لیے روانہ ہوئے۔اپنے دورہ پاکستان و آزاد جموں و کشمیر کے دوران زاہد مغل نے چیئرمین اوورسیز پاکستانیز فاؤنڈیشن سید قمر رضا اور قائمقام صدر آزاد جموں و کشمیر چوہدری لطیف اکبر سے اہم ملاقاتیں کیں،جن میں باہمی دلچسپی کے امور اور اوورسیز پاکستانیوں و کشمیریوں کے مسائل پر تبادلہ خیال کیا گیا۔

دورانِ قیام،زاہد مغل نے وزیراعظم آزاد جموں و کشمیر چوہدری فیصل ممتاز راٹھور کے اعزاز میں مغل ہاؤس میں ایک پرتکلف ظہرانہ بھی دیا۔

(جاری ہے)

اس موقع پر سیاسی و سماجی شخصیات کی بڑی تعداد شریک ہوئی۔مشیر وزیراعظم آزادکشمیر زاہد مغل کے اعزاز میں اسلام آباد،ڈڈیال،اسلام گڑھ،چکسواری اور دیگر علاقوں میں مختلف تقاریب، عشائیوں اور ظہرانوں کا انعقاد بھی کیا گیا جہاں مقامی شخصیات نے ان کی خدمات کو سراہا۔

روانگی سے قبل بینظیر بھٹو انٹرنیشنل ایئرپورٹ اسلام آباد پر میڈیا سے گفتگو کرتے ہوئے زاہد مغل نے کہا کہ وہ اہلیان پاکستان اور آزاد جموں و کشمیر کے بے حد مشکور ہیں جنہوں نے ان کا پرتپاک استقبال کیا اور ان کے اعزاز میں تقاریب کا اہتمام کیا۔انہوں نے کہا کہ بطور مشیر وزیراعظم آزادکشمیر وہ برطانیہ میں مقیم پاکستانی و کشمیری کمیونٹی کے مسائل کے حل کے لیے بھرپور اور مؤثر کردار ادا کریں گے۔انہوں نے مزید کہا کہ اوورسیز کمیونٹی ملک اور آزاد کشمیر کا قیمتی اثاثہ ہے اور ان کے مسائل کے حل کے لیے ہر ممکن اقدامات کیے جائیں گے۔