کراچی، چائے کی ہوٹل پر فائرنگ سے قتل کا مقدمہ مقتول کے دوست کی مدعیت میں درج

جمعرات 7 مئی 2026 16:30

کراچی(اُردو پوائنٹ اخبارتازہ ترین - این این آئی۔ 07 مئی2026ء) شہر قائد میں گلشن اقبال پولیس نے منگل کی شب مین یونیورسٹی روڈ تکون پارک کے قریب چائے کے ہوٹل پر فائرنگ سے قتل کا مقدمہ نمبر 285 سال 2026 بجرم دفعہ 302 اور 324 چونتیس کے تحت مقتول کے دوست کی مدعیت میں نامعلوم ملزمان کے خلاف درج کرلیا، ایس ایچ او گلشن اقبال سعود احمد نے بتایا کہ مدعی مقدمہ راجہ بشیر نے پولیس کو بیان دیا ہے کہ وہ گلشن اقبال بلاک 11 ارم اپارٹمنٹ کا رہائشی ، اپنا ذاتی اسٹیٹ ایجنسی و ٹریول کا کام کرتا ہوں۔

5 مئی بروز منگل بمقام مین یونیورسٹی روڈ جانب نیپا تکون پارک گلشن اقبال بلاک 7 میں واقع کوئٹہ چائے کی ہوٹل روڈ پر اپنے دوست 50 سالہ محمد واجد کے ہمراہ بیٹھا ہوا چائے پی رہا تھا کہ رات پونے گیارہ بجے کے قریب لوگوں کا شور شرابہ ہوا اور لوگ بھاگے۔

(جاری ہے)

اس دوران فائرنگ شروع ہوگئی جس کے نتیجے میں میری بائیں ٹانگ کی پنڈلی پر گولی لگی جبکہ میرے بائیں ہاتھ کے انگوٹھے پر بھی گولی لگی جس سے میں زخمی ہوگیا اور میرے دوست واجد کو بھی گولی لگی جس کے بعد چھیپا ایمبولینس کے ذریعے جناح اسپتال آگئے۔

مدعی کے مطابق میں ابھی جناح اسپتال میں زیر علاج ہوں اور مجھے معلوم ہوا ہے کہ میرے دوست واجد موقع پر ہی زخموں کی تاب نہ لاتے ہوئے ہلاک ہوگیا۔لہذا میرا دعوی نامعلوم شخص یا اشخاص پر نامعلوم وجوہات کی بنا پر میرے ساتھی واجد کو فائرنگ کر کے ہلاک اور مجھے زخمی کرنے ان کے خلاف کارروائی کی جائے جس کے بعد گلشن اقبال پولیس نے مقدمہ درج کر کے مزید تفتیش کے لیے انویسٹی گیشن پولیس کے حوالے کر دیا ۔