معرکہ حق کی تاریخی فتح، فیلڈ مارشل سید عاصم منیر کی جراتمند قیادت اور کشمیری عوام کی امیدیں ہیں سمعیہ ساجد

مظفرآباد(اُردو پوائنٹ اخبارتازہ ترین - این این آئی۔ 08 مئی2026ء) مرکزی چیئرپرسن مسلم کانفرنس خواتین ونگ، سابق امیدوار اسمبلی ویلی 6 اور چیئرپرسن کشمیر ویمن الرٹ فورم محترمہ سمعیہ ساجد نے معرکہ حق کی عظیم کامیابی کو ایک سال مکمل ہونے پر افواجِ پاکستان، عسکری قیادت، سیاسی قیادت اور بالخصوص فیلڈ مارشل سید عاصم منیر کو شاندار خراجِ تحسین پیش کرتے ہوئے کہا ہے کہ پاکستان نے ہندوستان کی جانب سے مسلط کردہ جارحیت کا جس دلیری، حکمت عملی اور پیشہ وارانہ مہارت کے ساتھ جواب دیا، اس نے پوری دنیا پر واضح کر دیا کہ پاکستان ایک ناقابلِ تسخیر، باوقار اور ذمہ دار ایٹمی قوت ہے۔

انہوں نے کہا کہ معرکہ حق صرف ایک جنگی کارروائی نہیں تھی بلکہ یہ پاکستان کی قومی غیرت، عسکری برتری، عوامی اتحاد اور کشمیری عوام کے ساتھ غیر متزلزل وابستگی کا عملی مظہر تھا۔

(جاری ہے)

محترمہ سمعیہ ساجد نے کہا کہ ہندوستانی قیادت نے اسرائیلی طرزِ عمل اپناتے ہوئے خطے میں جنگی جنون کو فروغ دیا، آزاد کشمیر اور پاکستان کے مختلف علاقوں کو نشانہ بنانے کی مذموم کوشش کی، مگر افواجِ پاکستان نے دشمن کے تمام عزائم خاک میں ملا دیے۔

انہوں نے کہا کہ فیلڈ مارشل سید عاصم منیر کی جراتمندانہ قیادت، غیر معمولی عسکری بصیرت اور بروقت فیصلوں نے دشمن کو ایسا سبق سکھایا جسے ہندوستان طویل عرصے تک فراموش نہیں کر سکے گا۔ ان کا کہنا تھا کہ پوری قوم کو اپنی بہادر افواج اور سپہ سالار پر فخر ہے جنہوں نے نہ صرف وطن عزیز کا دفاع کیا بلکہ دشمن کے غرور کو بھی پاش پاش کر دیا۔انہوں نے کہا کہ فیلڈ مارشل سید عاصم منیر نے جس دانشمندی، صبر، جرات اور حکمت کے ساتھ عسکری حکمت عملی مرتب کی، اس نے پاکستان کی دفاعی تاریخ میں ایک نئے باب کا اضافہ کیا۔

انہوں نے کہا کہ دشمن کو یہ گمان تھا کہ وہ پاکستان پر دبائو ڈال کر اپنے ناپاک عزائم میں کامیاب ہو جائے گا، مگر پاکستان کی مسلح افواج نے ثابت کیا کہ یہ قوم اپنے دفاع سے غافل نہیں اور نہ ہی اپنے دشمن کو کسی قسم کی جارحیت کی اجازت دے سکتی ہے۔ محترمہ سمعیہ ساجد نے کہا کہ فیلڈ مارشل سید عاصم منیر صرف ایک عسکری رہنما نہیں بلکہ پوری قوم کے اعتماد، عزم اور قومی وقار کی علامت بن چکے ہیں۔

ان کی قیادت میں افواجِ پاکستان نے جس اتحاد اور قوت کا مظاہرہ کیا، اس پر ہر پاکستانی کو فخر ہے۔انہوں نے کہا کہ پاک فضائیہ اور پاک بحریہ نے جس جرات، مہارت اور پیشہ وارانہ صلاحیت کا مظاہرہ کیا، وہ دنیا کی عسکری تاریخ میں سنہری حروف سے لکھا جائے گا۔ دشمن کے ہوائی اڈوں، چھائونیوں اور اہم تنصیبات کو کامیابی کے ساتھ نشانہ بنا کر پاکستان نے اپنی دفاعی صلاحیتوں کا لوہا منوایا۔

انہوں نے کہا کہ دشمن کے جدید جنگی طیاروں کو تباہ کر کے پاکستانی شاہینوں نے پوری دنیا کو حیران کر دیا۔ انہوں نے کہا کہ پاکستان کے جانباز سپاہیوں نے یہ ثابت کیا کہ وطن عزیز کی سلامتی پر کوئی سمجھوتہ نہیں کیا جا سکتا۔محترمہ سمعیہ ساجد نے کہا کہ معرکہ حق کی کامیابی نے نہ صرف پاکستانی قوم کے حوصلے بلند کیے بلکہ مقبوضہ جموں و کشمیر کے مظلوم عوام کے دلوں میں بھی امید کی نئی کرن روشن کی۔

انہوں نے کہا کہ کشمیری عوام آج بھی پاکستان کو اپنی امیدوں کا مرکز سمجھتے ہیں اور فیلڈ مارشل سید عاصم منیر کو ایک ایسے نڈر اور باصلاحیت سپہ سالار کے طور پر دیکھتے ہیں جو نہ صرف پاکستان بلکہ مسئلہ کشمیر کے حوالے سے بھی واضح اور دوٹوک موقف رکھتے ہیں۔ انہوں نے کہا کہ مقبوضہ کشمیر کے عوام نے ہمیشہ پاکستان کے ساتھ اپنی محبت اور وابستگی کا اظہار کیا ہے اور آج بھی وہ پاکستان کی کامیابیوں کو اپنی کامیابی سمجھتے ہیں۔

انہوں نے کہا کہ ہندوستان نے ظلم، جبر، ریاستی دہشت گردی اور انسانی حقوق کی سنگین خلاف ورزیوں کے ذریعے کشمیری عوام کی آواز دبانے کی کوشش کی، مگر کشمیری عوام کے حوصلے آج بھی بلند ہیں۔ انہوں نے کہا کہ کشمیری عوام اپنی جدوجہدِ آزادی سے ایک انچ بھی پیچھے نہیں ہٹیں گے اور پاکستان کی اخلاقی، سیاسی اور سفارتی حمایت ان کے لیے طاقت کا سرچشمہ ہے۔

محترمہ سمعیہ ساجد نے کہا کہ پاکستان نے ہر عالمی فورم پر کشمیری عوام کے حقِ خودارادیت کی حمایت کی اور آئندہ بھی یہ حمایت جاری رہے گی۔انہوں نے کہا کہ معرکہ حق کی کامیابی نے یہ ثابت کیا کہ پاکستانی قوم اپنی افواج کے ساتھ سیسہ پلائی دیوار کی مانند کھڑی ہے۔ سیاسی اختلافات کے باوجود پوری قوم نے ایک پلیٹ فارم پر متحد ہو کر دشمن کو واضح پیغام دیا کہ پاکستان کے دفاع اور سلامتی پر کوئی سمجھوتہ ممکن نہیں۔

انہوں نے کہا کہ یہی قومی اتحاد پاکستان کی اصل طاقت ہے اور اسی اتحاد نے دشمن کے تمام عزائم کو ناکام بنایا۔محترمہ سمعیہ ساجد نے عالمی برادری سے مطالبہ کیا کہ جنوبی ایشیا میں پائیدار امن کے قیام کے لیے مسئلہ جموں و کشمیر کو اقوام متحدہ کی سلامتی کونسل کی قراردادوں کے مطابق حل کیا جائے۔ انہوں نے کہا کہ جب تک کشمیری عوام کو ان کا بنیادی حقِ خودارادیت نہیں دیا جاتا، اس وقت تک خطے میں پائیدار امن کا خواب شرمندہ تعبیر نہیں ہو سکتا۔

انہوں نے کہا کہ عالمی طاقتوں کو چاہیے کہ وہ ہندوستانی مظالم کا نوٹس لیں اور مقبوضہ کشمیر میں انسانی حقوق کی سنگین خلاف ورزیوں کو رکوانے کے لیے عملی اقدامات کریں۔انہوں نے مزید کہا کہ کشمیری عوام اپنے شہداء کی قربانیوں کو کبھی فراموش نہیں کریں گے اور آزادی کی منزل حاصل ہونے تک ان کی جدوجہد جاری رہے گی۔ انہوں نے کہا کہ پاکستان اور کشمیر کا رشتہ صرف جغرافیائی نہیں بلکہ ایمان، قربانی اور نظریے کا رشتہ ہے، جسے دنیا کی کوئی طاقت کمزور نہیں کر سکتی۔

انہوں نے کہا کہ وہ دن دور نہیں جب مقبوضہ کشمیر آزاد ہوگا اور کشمیری عوام اپنی مرضی کے مطابق مستقبل کا فیصلہ کریں گے۔ محترمہ سمعیہ ساجد نے ایک مرتبہ پھر فیلڈ مارشل سید عاصم منیر، افواجِ پاکستان، پاک فضائیہ، پاک بحریہ اور پوری پاکستانی قوم کو معرکہ حق کی تاریخی فتح پر مبارکباد پیش کرتے ہوئے کہا کہ پاکستان ہمیشہ قائم و دائم رہے گا اور دشمن کی ہر سازش ناکام ہو گی۔ انہوں نے کہا کہ پاکستان کی بہادر افواج نے اپنے خون اور قربانیوں سے وطن عزیز کا دفاع ناقابلِ تسخیر بنا دیا ہے اور پوری قوم اپن کو سلام پیش کرتی ہے۔