لاہور چیمبر اور آسٹریلیا پاکستان چیمبر کے درمیان دوطرفہ تجارتی تعاون بڑھانے کے لیے مفاہمتی یادداشت پر دستخط

جمعہ 8 مئی 2026 18:48

لاہور (اُردو پوائنٹ اخبارتازہ ترین - این این آئی۔ 08 مئی2026ء) لاہور چیمبر آف کامرس اینڈ انڈسٹری اور آسٹریلیا پاکستان چیمبر آف ٹریڈ، کامرس اینڈ انڈسٹری (اے پی سی) کے درمیان پاکستان اور آسٹریلیا کے مابین تجارتی، معاشی، تکنیکی اور کاروباری تعلقات کو فروغ دینے کے لیے مفاہمتی یادداشت پر دستخط کیے گئے۔اس مفاہمتی یادداشت پر لاہور چیمبر کے صدر فہیم الرحمن سہگل اور اے پی سی کے صدر محمد آصف نے دستخط کیے۔

تقریب میں آسٹریلیا میں پاکستان کے ہائی کمشنر عرفان شوکت، قونصل جنرل قمر زمان، اعزازی مشیر برسئے انویسٹمنٹ سکندر لودھی اور اے پی سی کے فنانس سیکریٹری محمد عابد بھی موجود تھے۔معاہدے کے تحت دونوں ادارے سرمایہ کاری کے مواقع، ایس ایم ای تعاون، مشترکہ منصوبوں کے قیام اور کاروباری معاونت کے ڈھانچے کو فروغ دینے کے لیے مل کر کام کریں گے۔

(جاری ہے)

دونوں تنظیموں نے کاروباری تقریبات کے انعقاد، تجارتی معلومات کے تبادلے، ممکنہ کاروباری روابط بڑھانے اور نمائشوں و تجارتی قوانین سے متعلق معلومات فراہم کرنے پر بھی اتفاق کیا۔اس موقع پر لاہور چیمبر کے صدر فہیم الرحمن سہگل نے کہا کہ یہ ایم او یو پاکستان اور آسٹریلیا کی کاروباری برادریوں کے درمیان تعاون کے نئے مواقع پیدا کرے گا اور دوطرفہ تجارت و سرمایہ کاری کے فروغ میں مددگار ثابت ہوگا۔

انہوں نے کہا کہ چیمبرز آف کامرس کے درمیان قریبی روابط کاروباری سہولیات اور نئے معاشی مواقع پیدا کرنے کے لیے انتہائی اہم ہیں۔معاہدے کے تحت دونوں تنظیمیں براہِ راست روابط، مشترکہ کمیٹیوں، باقاعدہ مشاورت اور ایک دوسرے کے پلیٹ فارمز و سرگرمیوں کے فروغ کے ذریعے کاروباری روابط کو مزید مضبوط بنائیں گی۔ دونوں اداروں نے کاروباری تنازعات کے حل کے لیے بین الاقوامی ثالثی نظام کے استعمال کی حوصلہ افزائی پر بھی اتفاق کیا۔