مہنگی بجلی اور لوڈشیڈنگ نے کاروبار تباہ کردیے، ایاز میمن موتی والا

جمعہ 8 مئی 2026 18:17

کراچی (اُردو پوائنٹ اخبارتازہ ترین - این این آئی۔ 08 مئی2026ء) کراچی تاجر الائنس کے چیئرمین و بانی، عام آدمی پاکستان، ایاز میمن موتی والا نے کہا ہے کہ تاجر برادری کے مسائل اور پریشانیاں اب ناقابلِ برداشت ہوتی جارہی ہیں۔ دنیا کا کوئی بھی ملک بجلی کے بغیر ترقی نہیں کرسکتا، مگر پاکستان میں مہنگی بجلی اور بدترین لوڈشیڈنگ نے کاروباری سرگرمیوں کو تباہ کرکے رکھ دیا ہے۔

انہوں نے کہا کہ تاجر برادری ہر ملاقات اور ہر فورم پر حکومتی نااہلی، بڑھتی ہوئی مہنگائی، اضافی ٹیکسز اور بجلی بحران پر شدید تشویش کا اظہار کررہی ہے۔ مسلسل لوڈشیڈنگ اور بجلی کی بلند قیمتوں کے باعث چھوٹے اور درمیانے درجے کے کاروبار بند ہونے کے قریب پہنچ چکے ہیں۔ایاز میمن موتی والا نے کہا کہ خصوصا کراچی کے شہری ایک گھنٹہ بجلی کے بعد تین تین گھنٹے کی طویل لوڈشیڈنگ برداشت کرنے پر مجبور ہیں۔

(جاری ہے)

بنیادی سہولیات کی عدم دستیابی، مہنگائی اور بجلی بحران نے عوام کو شدید ذہنی اذیت میں مبتلا کردیا ہے۔انہوں نے مزید کہا کہ بجلی کی غیر اعلانیہ لوڈشیڈنگ نے تاجروں، صنعتکاروں اور عام شہریوں کی زندگی اجیرن بنادی ہے جبکہ کاروباری مراکز و مارکیٹیں شدید متاثر ہورہی ہیں۔ اگر فوری اقدامات نہ کیے گئے تو معیشت مزید بحران کا شکار ہوسکتی ہے۔انہوں نے حکومت سے مطالبہ کیا کہ تاجروں اور عوام کو فوری ریلیف فراہم کیا جائے، بجلی کی قیمتوں میں کمی کی جائے اور لوڈشیڈنگ کے خاتمے کیلئے ہنگامی بنیادوں پر عملی اقدامات کیے جائیں تاکہ عوام اور کاروباری طبقے کا اعتماد بحال ہوسکے۔