تھیلیسیمیا کے مریض خصوصی توجہ، ہمدردی اور اجتماعی تعاون کے مستحق ہیں، نہال ہاشمی

جمعہ 8 مئی 2026 19:12

ٴْکراچی(اُردو پوائنٹ اخبارتازہ ترین - آن لائن۔ 08 مئی2026ء) سید محمد نہال ہاشمی نے ورلڈ تھیلیسیمیا ڈے کے موقع پر اپنے پیغام میں کہا ہے کہ تھیلیسیمیا کے مریض خصوصی توجہ، ہمدردی اور اجتماعی تعاون کے مستحق ہیں۔انہوں نے کہا کہ شادی سے قبل خون کے ٹیسٹ اور جینیاتی اسکریننگ تھیلیسیمیا سے بچاؤ کا مؤثر ذریعہ ہیں، جبکہ خون کا عطیہ دینا ایک عظیم انسانی خدمت ہے جو کئی زندگیاں بچانے میں مدد دیتا ہے۔

(جاری ہے)

گورنر سندھ کے مطابق تھیلیسیمیا کے خلاف آگاہی مہمات ہم سب کی مشترکہ سماجی ذمہ داری ہیں اور اس حوالے سے مسلسل کوششوں کی ضرورت ہے۔انہوں نے بتایا کہ سندھ گورنر ہاؤس میں ایک ہفتہ قبل تھیلیسیمیا ویک کا باقاعدہ آغاز کیا گیا تھا، جس کا مقصد عوام میں شعور اجاگر کرنا ہے۔سید محمد نہال ہاشمی نے کہا کہ حکومت تھیلیسیمیا کے مریضوں کے علاج اور سہولیات کی فراہمی کے لیے عملی اقدامات جاری رکھے ہوئے ہے۔انہوں نے زور دیا کہ صحت مند اور محفوظ مستقبل کے لیے نوجوان نسل کو تھیلیسیمیا سے بچاؤ کے بارے میں آگاہ کرنا ناگزیر ہے۔