آبنائے ہرمز میں تیل بردار مصنوعات سے لدا چینی ٹینکر حملے کا نشانہ بنا ہے. ترجمان چینی وزارت خارجہ

بیجنگ/لندن(اردوپوائنٹ اخبارتازہ ترین-انٹرنیشنل پریس ایجنسی۔08 مئی ۔2026 ) چین کی وزارت خارجہ نے تصدیق کی ہے کہ آبنائے ہرمز میں تیل بردار مصنوعات سے لدے ایک ٹینکر، جس پر چینی عملہ سوار تھا، حملے کا نشانہ بنا ہے وزارت خارجہ نے مشرقِ وسطیٰ میں جاری کشیدگی کے باعث تجارتی جہازوں کو لاحق خطرات پر شدید تشویش کا اظہار کیا ہے. چینی وزارت خارجہ کے ترجمان لِن جیان نے ایک پریس کانفرنس کے دوران بتایا کہ مذکورہ جہاز پر چینی شہری بھی موجود تھے، تاہم اب تک عملے کے کسی فرد کے زخمی ہونے کی کوئی اطلاع سامنے نہیں آئی ہے یاد رہے کہ چینی نشریاتی ادارے نے گزشتہ روز رپورٹ کیا تھا کہ ایک چینی ملکیت کا تیل بردار جہاز پیر کے روز آبنائے ہرمز کے قریب حملے کی زد میں آیا ہے.

(جاری ہے)

یہ واقعہ اسی دن پیش آیا ہے جب امریکی صدر ڈونلڈ ٹرمپ نے ہرمزمیں پھنسے جہازوں کی مدد کے لیے آپریشن”فریڈم“شروع کرنے کا اعلان کیا تھا اس سے پہلے جنوبی کوریا کے ایک جہازکو نشانہ بنانے کی اطلاعات سامنے آئی تھیں جس پر ایران نے وضاحت جاری کرتے ہوئے کہا تھا کہ تہران کی جانب سے کوریاکے جہازپر کوئی حملہ نہیں کیا گیا ‘ایران نے معاملے کی غیرجانبدرانہ عالمی تحقیقات اور ذمہ داروں کے تعین کا بھی مطالبہ کیا تھا بعدازاں عالمی ذرائع ابلاغ اور سیول نے اس معاملے پر مزید گفتگو نہیں کی .

ایک عالمی ادارے کی رپورٹ میں دعوی کیا گیا تھا کہ دوبئی کی بندرگاہ کے نزدیک کوریا کے بحری جہازکو امریکی‘اسرائیلی یا اماراتی میزائل سے غلطی سے یا جان بوجھ کرنشانہ بنایا ہے تاہم اس دعوے کی تصدیق نہیں ہوسکی یہ پہلا موقع ہے کہ چینی آئل ٹینکر پر حملہ کیا گیا رپورٹ میں بتایا گیا تھا کہ جہاز کے ڈیک میں آگ لگ گئی جسے ”کروراینڈ اونرچائنا“کے نام سے شناخت کیا گیا چین ایرانی تیل کا ایک اہم خریدار ہے جس کے جہازکو خلیج عمان میں امریکی ناکہ بندی کے علاقے میں نشانہ بنایا گیا‘عالمی نشریاتی ادارے نے اسے خطرناک عمل قراردیا ہے ممکنہ طور پر یہ وہی جہازہے جس کے بارے میں امریکا سینٹرل کمانڈنے دعوی کیا تھا کہ امریکی ناکہ بندی کے خلاف ورزی کرنے والے ایک ایرانی جہازپر فائرنگ کرکے اسے ناکارہ بنایا گیا ہے تاہم ادارے کے مطابق اس کی سرکاری ذرائع سے تصدیق نہیں ہوسکی .

ادھر برطانوی خبررساں ادارے کا کہنا ہے کہ واقعہ متحدہ عرب امارات کے ساحل پر پیش آیا ہے ادارے نے میری ٹائم سیکیورٹی ذرائع کے حوالے سے بتایاہے کہ جس چینی جہاز کو نقصان پہنچا وہ مارشل آئی لینڈ کے جھنڈے والے تیل کی مصنوعات اور کیمیکل ٹینکر JV Innovation کا حصہ سمجھا جاتا ہے تاہم چینی وزارت خارجہ کی جانب سے تصدیق کے بعد ابہام نہیں رہا کہ آئل ٹینکر چین کی ملکیت تھا تاہم اس معاملے پر ابہام باقی ہے اسے کس علاقے میں اور کس فریق کی جانب سے نشانہ بنایا گیا چینی حکام نے اس بارے میں ابھی وضاحت جاری نہیں کی.