حج 2026 ، سرکاری کوٹے کے 44 فیصد عازمین سعودی عرب پہنچ گئے ، عازمین کی سہولت کے لئے مکرمہ میں 230 بسیں فعال

ہفتہ 9 مئی 2026 14:37

مکہ مکرمہ (اُردو پوائنٹ اخبارتازہ ترین - اے پی پی۔ 09 مئی2026ء) حج 2026 کے مقدس سفر کے لیے پاکستان سے عازمین حج کی آمد کا سلسلہ تیزی سے جاری ہے۔ اب تک 207 خصوصی پروازوں کے ذریعے مجموعی طور پر 52,195 سرکاری عازمین حج سعودی عرب پہنچ چکے ہیں ۔ یہ تعداد مختص کردہ سرکاری کوٹے کا 44 فیصد بنتی ہے ۔ عازمین کی سہولت اور رہنمائی کے لیے پاکستان حج مشن کے 1,090 اہلکار فیلڈ میں فرائض سرانجام دے رہے ہیں ۔

پاکستان حج مشن کے مطابق اب تک 135 پروازیں مدینہ منورہ اور 72 پروازیں جدہ ایئرپورٹ پر لینڈ کر چکی ہیں ۔ سرکاریاسکیم کے ساتھ ساتھ پرائیویٹ حج سکیم کے تحت بھی اب تک 12,111 عازمین سعودی عرب پہنچے ہیں ۔ اس وقت مجموعی سرکاری عازمین کا 85 فیصد یعنی 44,370 مکہ مکرمہ میں مقیم ہیں جبکہ 15 فیصد یعنی 7,825 عازمین مدینہ منورہ میں موجود ہیں ۔

(جاری ہے)

عازمین کی سہولت کے لیے مجموعی طور پر 652 معاونین، 255 طبی عملہ اور 183 خدام و ٹیکنیکل سٹاف تعینات کیا گیا ہے ۔

افرادی قوت کی تقسیم کے مطابق مکہ مکرمہ میں 791، مدینہ منورہ میں 280 اور جدہ میں 19 اہلکار عازمین کو خدمات فراہم کر رہے ہیں ۔ مکہ مکرمہ میں عازمین حج کی حرم پاک تک آمد و رفت کو آسان بنانے کے لیے ٹرانسپورٹ کے مربوط انتظامات کیے گئے ہیں ۔ اس مقصد کے لیے اب تک 230 بسیں فعال کی جا چکی ہیں تاکہ ضیوف الرحمن کو سفری سہولیات بلا تعطل میسر رہیں ۔