معرکہ حق پاکستان کی قومی یکجہتی، عزم اور خودمختاری کے تحفظ کی مضبوط علامت بن چکا ہے ،وفاقی وزیر تجارت

ہفتہ 9 مئی 2026 15:45

اسلام آباد (اُردو پوائنٹ اخبارتازہ ترین - اے پی پی۔ 09 مئی2026ء) وفاقی وزیر تجارت جام کمال خان نےکہا ہے کہ معرکہ حق پاکستان کی قومی یکجہتی، عزم اور خودمختاری کے تحفظ کی مضبوط علامت بن چکا ہے،معرکہ حق نے ثابت کیا کہ پاکستانی قوم اپنی افواج کے شانہ بشانہ وطن کے دفاع کیلئے متحد کھڑی ہے۔وزارت تجارت کی جانب سے ہفتہ کو معرکہ حق کے حوالہ سےجاری پیغام میں وفاقی وزیر نے کہا کہ پاک افواج نے معرکہ حق کے دوران اعلیٰ پیشہ ورانہ صلاحیت، تیاری اور حکمتِ عملی کا عملی مظاہرہ کیا۔

انہوں نے کہا کہ معرکہ حق کی کامیابی نے دشمن کو واضح پیغام دیا کہ پاکستان ہر جارحیت کا موثر جواب دینے کی مکمل صلاحیت رکھتا ہے۔جام کمال خان نے کہا کہ پاکستان ایک پرامن اور ذمہ دار ریاست ہے جو مذاکرات، علاقائی استحکام اور مثبت تعاون پر یقین رکھتی ہے۔

(جاری ہے)

انہوں نے کہا کہ پاک افواج کی جرات، قربانیاں اور پیشہ ورانہ مہارت پوری قوم کےلئے باعثِ فخر ہیں۔

وفاقی وزیر تجارت نے کہا کہ معرکہ حق نے جدید دفاعی تیاری، قومی ہم آہنگی اور موثر حکمتِ عملی کی اہمیت کو اجاگر کیا۔انہوں نے کہا کہ پاکستان امن، معاشی استحکام اور علاقائی روابط کے فروغ کیلئے پُرعزم ہے۔ وفاقی وزیر نے کہا کہ پاکستان کی خودمختاری، سلامتی اور قومی وقار پر کوئی سمجھوتہ نہیں کیا جا سکتا،قوم اور افواج کا مضبوط اتحاد پاکستان کی سب سے بڑی کامیابی ہے۔