اسحاق ڈار کی زیرصدارت نئی وفاقی اور صوبائی یونیورسٹیوں کے قیام اور یونیورسٹی چارٹرز سے متعلق مسودہ قوانین کا جائزہ لیا گیا

پیر 11 مئی 2026 20:20

اسلام آباد (اُردو پوائنٹ اخبارتازہ ترین - این این آئی۔ 11 مئی2026ء) نائب وزیراعظم و وزیر خارجہ سینیٹر محمد اسحاق ڈار نے نئی وفاقی اور صوبائی یونیورسٹیوں کے قیام اور یونیورسٹی چارٹرز سے متعلق مسودہ قوانین کے جائزے کے حوالے سے ایک اجلاس کی صدارت کی۔پیر کو نائب وزیراعظم آفس سے جاری بیان کے مطابق اجلاس میں بتایا گیا کہ یونیورسٹیوں کے قیام کے لیے 2002 میں وضع کردہ معیار اب فرسودہ ہو چکا ہے اور موجودہ تعلیمی، تحقیقی اور مارکیٹ کی ضروریات سے ہم آہنگ نہیں رہا۔

نائب وزیراعظم و وزیر خارجہ سینیٹر محمد اسحاق ڈار نے اس بات پر زور دیا کہ نظام کو جدید خطوط پر استوار کرنا ضروری ہے تاکہ نئی یونیورسٹیاں معیاری تعلیم اور تحقیقی برتری کے بین الاقوامی معیار پر پورا اتر سکیں۔

(جاری ہے)

فیصلہ کیا گیا کہ ہائر ایجوکیشن کمیشن (ایچ ای سی) یکم جون 2026 تک یونیورسٹیوں کے قیام کے معیار پر نظرِثانی کرے گا جبکہ تمام زیر التوا معاملات کو نئے فریم ورک کی تکمیل کے بعد اسی کے تحت جانچا جائے گا۔

اجلاس میں یونیورسٹیوں کی کارکردگی، مختلف شعبہ جات، عالمی درجہ بندیوں اور بین الاقوامی سطح پر طلب رکھنے والے مضامین کو ترجیح دینے کی اہمیت پر بھی تبادلہ خیال کیا گیا۔نائب وزیراعظم و وزیر خارجہ نے اس امر پر زور دیا کہ اعلی تعلیم کے شعبے کو روزگار کے مواقع، جدت اور تحقیقی اثرات کے حوالے سے مضبوط نتائج فراہم کرنا ہوں گے تاکہ فارغ التحصیل طلبہ کو ملکی اور عالمی سطح پر بہتر مواقع میسر آ سکیں۔ اجلاس میں وفاقی وزیر برائے بین الصوبائی رابطہ رانا ثنا اللہ، وزیراعظم کے معاون خصوصی طارق باجوہ، سیکریٹری تعلیم، ایچ ای سی کی قیادت، ریکٹر نسٹ اور متعلقہ وزارتوں کے سینئر حکام نے شرکت کی۔