صوبے کے امن، استحکام اور عوامی مفادات کیخلاف ہر اقدام کی بھرپور مخالفت کریں گے

بند کمروں کی مسلط کردہ پالیسیوں کے باعث صوبہ ایک بار پھر بدامنی کی لپیٹ میں آ گیا ہے، مسلسل آپریشنز اور ڈرون حملوں سے کولیٹرل ڈیمجز ناسور بن چکا ہے، وزیراعلیٰ سہیل آفریدی کا الزام

ثنااللہ ناگرہ پیر 11 مئی 2026 19:28

صوبے کے امن، استحکام اور عوامی مفادات کیخلاف ہر اقدام کی بھرپور مخالفت ..

پشاور (اردوپوائنٹ اخبار تازہ ترین۔ انٹرنیشنل پریس ایجنسی ۔ 11 مئی 2026ء ) وزیر اعلیٰ خیبرپختونخوا محمد سہیل آفریدی نے الزام عائد کیا ہے کہ بند کمروں کی مسلط کردہ پالیسیوں کے باعث صوبہ ایک بار پھر بدامنی کی لپیٹ میں آ گیا ہے، مسلسل آپریشنز اور ڈرون حملوں سے کولیٹرل ڈیمجز ناسور بن چکا ہے۔ سی کےپی کی سوشل میڈیا ویب سائٹ کے مطابق وزیراعلیٰ خیبرپختونخوا محمد سہیل آفریدی نے ضلع ہنگو کا دورہ، دروڑی بانڈہ دہشتگرد حملے کے شہداء کے لواحقین سے ملاقات کی، وزیر اعلیٰ نے شہداء کے درجات کی بلندی کے لیے فاتحہ خوانی کی اور لواحقین سے دلی ہمدردی اور یک جہتی کا اظہار کیا۔

وزیر اعلیٰ محمد سہیل خان آفریدی کی سربراہی میں ضلع ہنگو میں پارلیمنٹیرینز، عمائدین اور سرکاری حکام کے جرگے کا انعقاد ہوا۔

(جاری ہے)

کوئی بھی چیز انسانی جان کا نعم البدل نہیں ہو سکتی، ہم لواحقین کے غم میں برابر کے شریک ہیں اور ان کے حوصلے کو سلام پیش کرتے ہیں، ظلم کے خلاف جنگ مشترکہ ہے، ہم اس معاملے میں سیاسی و نظریاتی وابستگیوں سے بالاتر ایک پیج پر ہیں، مسلسل آپریشنز اور ڈرون حملوں کے باعث کولیٹرل ڈیمجز ایک ناسور بن چکا ہے، صوبائی حکومت متاثرہ خاندانوں کو تنہا نہیں چھوڑیں گے، شہید پیکج اور تمام سہولیات کی فراہمی یقینی بنائیں گے۔

امن سب کا مطالبہ اور اولین ضرورت ہے، امن کی بحالی اور حقوق کے لیے جدوجہد جاری رکھیں گے، شہداء کے خون کو رائیگاں نہیں جانے دیں گے۔ خیبرپختونخوا پولیس اور شہریوں نے دہشتگردی کے خلاف جنگ میں بے شمار قربانیاں دی ہیں، بند کمروں کی مسلط کردہ پالیسیوں کے باعث صوبہ ایک بار پھر بدامنی کی لپیٹ میں آ گیا، صوبے کے امن، استحکام اور عوامی مفادات کے خلاف ہر اقدام کی بھرپور مخالفت کریں گے، شہداء کی قربانیوں کو ہمیشہ یاد رکھا جائے گا، پائیدار امن کا قیام حکومت کی ترجیحات میں سرفہرست ہے۔