Live Updates

صدر آصف زرداری کی وفاقی حکومت کو عوام کو مہنگائی میں کمی کیلئے ریلیف فراہم کرنے کی ہدایت

صدرمملکت اور وزیراعظم کی ملاقات ، خطے کی بدلتی صورتحال پر تبادلہ خیال، مشرق وسطیٰ میں کشیدگی ہے اورسپلائی چین متاثر ہونے کے باوجود عوام کوریلیف فراہم کیا جائے، صدرمملکت آصف زرداری کی گفتگو

ثنااللہ ناگرہ پیر 11 مئی 2026 20:16

صدر آصف زرداری کی وفاقی حکومت کو عوام کو مہنگائی میں کمی کیلئے ریلیف ..

اسلام آباد (اردوپوائنٹ اخبار تازہ ترین۔ انٹرنیشنل پریس ایجنسی ۔ 11 مئی 2026ء ) صدرمملکت آصف زرداری نے وفاقی حکومت کو عوام کو مہنگائی میں کمی کیلئے ریلیف فراہم کرنے کی ہدایت کردی۔ میڈیا کے مطابق اعلامیہ میں کہا گیا کہ صدر مملکت آصف زرداری سے ایوان صدر میں وزیراعظم شہبازشریف نے ملاقات کی ، ملاقات میں ملکی صورتحال، افغانستان سے متعلق امور اور خطے کی بدلتی صورتحال پر تبادلہ خیال کیا گیا۔

ملاقات میں معرکہ حق کے شہداء اور مسلح افواج کی پیشہ ورانہ صلاحیتوں کو خراج تحسین پیش کیا گیا۔ ملاقات میں نائب وزیراعظم اسحاق ڈار ، اسپیکر اسمبلی ایاز صادق، محسن نقوی، اعظم نذیر تارڑ، سلیم مانڈوی والا اور ڈاکٹر عاصم بھی شریک تھے۔ صدر مملکت آصف زرداری اور وزیراعظم شہباز شریف نے قومی دفاع پر غیرمتزلزل عزم کا اعادہ کیا۔

(جاری ہے)

صدر آصف زرادری نے کہا کہ مشکل جغرافیائی اور علاقائی صورتحال سمیت مشرق وسطیٰ میں کشیدگی ہے۔

صدر آصف زرداری نے حکومت کو ہدایت کی کہ سپلائی چین متاثر ہونے کے باوجود عوام کو زیادہ سے زیادہ ریلیف فراہم کیا جائے۔ عام آدمی کو ریلیف فراہم کرنے کیلئے ممکنہ اقدامات کئے جائیں۔ مہنگائی میں کمی اور اشیائے ضروریہ کی دستیابی کیلئے اقدامات کئے جائیں۔ دوسری جانب وفاقی وزیرِ پٹرولیم علی پرویز ملک نے پاکستان میں پٹرول اور ڈیزل مہنگا کرنے کا سارا ملبہ آئی ایم ایف پر ڈالتے ہوئے کہا ہے کہ آئی ایم ایف پروگرام کے تحت لیوی بڑھانا پڑی۔

اطلاعات کے مطابق سینیٹ کی قائمہ کمیٹی برائے پٹرولیم کا اجلاس ہوا، جس میں وزیرِ مملکت برائے پٹرولیم علی پرویز ملک نے ملک میں پٹرولیم مصنوعات کی قیمتوں، ٹیکسز کے ڈھانچے اور عالمی مالیاتی ادارے آئی ایم ایف کی شرائط پر تفصیلی بریفنگ دی، انہوں نے سینیٹ کی قائمہ کمیٹی برائے پٹرولیم کو بریفنگ دیتے ہوئے کہا کہ آئی ایم ایف کے اہداف پورا کرنے کے لیے پٹرولیم لیوی میں مزید اضافے کا دباؤ ہے، جس کے تحت ڈیزل اور پٹرول پر لیوی کو 160 روپے فی لیٹر تک پہنچانے کا ہدف دیا گیا ہے۔

علی پرویز ملک نے کمیٹی کو بتایا کہ پاکستان میں پٹرولیم مصنوعات کی قیمتیں بلند رہنے کی سب سے بڑی وجہ ان پر عائد بھاری لیوی ہے، جب مالی سال کا بجٹ تیار کیا گیا تھا، تو آئی ایم ایف کے ساتھ 80 روپے فی لیٹر لیوی وصول کرنے کا معاہدہ طے پایا تھا، بجٹ کے بعد معاشی حالات تبدیل ہوئے، جس کے باعث آئی ایم ایف کے پروگرام کو برقرار رکھنے کے لیے لیوی میں اضافہ کرنا پڑا۔