گلگت میں مختلف شعبوں میں نمایاں خدمات انجام دینے والی شخصیات کو قومی ایوارڈز سے نواز دیا گیا

بدھ 13 مئی 2026 16:59

گلگت (اُردو پوائنٹ اخبارتازہ ترین - اے پی پی۔ 13 مئی2026ء) گورنر ہاؤس گلگت میں ایک باوقار تقریبِ تقسیمِ سول اعزازات کا انعقاد کیا گیا، جس میں صدرِ مملکت کی منظوری سے مختلف شعبہ ہائے زندگی میں نمایاں خدمات انجام دینے والی شخصیات کو پاکستان سول ایوارڈز سے نوازا گیا۔تقریب میں اعلیٰ حکومتی و عسکری حکام، سیاسی و سماجی شخصیات، سول سوسائٹی کے نمائندگان، معززین علاقہ اور ایوارڈ یافتگان کے اہل خانہ نے شرکت کی۔

اس موقع پر گورنر گلگت بلتستان سید مہدی شاہ نے ایوارڈ حاصل کرنے والی شخصیات کو مبارکباد پیش کرتے ہوئے کہا کہ یہ اعزازات اُن افراد کی قومی خدمات، محنت، قابلیت اور عوامی فلاح کیلئے گراں قدر کردار کا اعتراف ہیں۔تقریب کے دوران معروف ماہرِ تعلیم ڈاکٹر مولا داد شفا کو تعلیم کے شعبے میں نمایاں خدمات پر ستارۂ امتیاز سے نوازا گیا، جبکہ معروف نعت خواں خواجہ علی کاظم کو فن کے شعبے میں صدارتی تمغہ برائے حسنِ کارکردگی عطا کیا گیا۔

(جاری ہے)

اسی طرح غلام نبی کو تعلیم، عمران اللہ ہنزائی کو بصری فنون، محمد امین ضیا کو ادب و شاعری جبکہ تسنیم زہرا کو سماجی خدمات کے اعتراف میں تمغۂ امتیاز سے نوازا گیا۔تقریب سے خطاب کرتے ہوئے مقررین نے اعزاز حاصل کرنے والی شخصیات کی خدمات کو گلگت بلتستان اور پاکستان کیلئے باعثِ فخر قرار دیا۔ گورنر گلگت بلتستان سید مہدی شاہ نے کہا کہ گلگت بلتستان کی یہ قابلِ فخر شخصیات اپنی صلاحیتوں اور خدمات کے ذریعے نہ صرف خطے بلکہ پورے ملک کا نام روشن کر رہی ہیں، جبکہ یہ اعزازات نوجوان نسل کیلئے بھی ایک مثبت مثال ثابت ہوں گے۔ تقریب کے اختتام پر ملکی سلامتی، ترقی اور خوشحالی کیلئے خصوصی دعا بھی کی گئی۔