صومالی قزاقوں کا انوکھا مطالبہ! تاوان نہیں چاہیئے، صدر زرداری سے بات کرنی ہے، انصار برنی کا انکشاف

ہم سے انہوں نے کوئی تاوان نہیں مانگا، انہوں نے ہم سے صرف یہ کہا کہ دیر ہورہی ہے، ہم نے ان سے کہا ایک دفعہ پھر ہماری پاکستانیوں سے بات کروادو، یہ ان کی مہربانی ہے کہ انہوں نے بات کروائی؛ سماجی کارکن کی گفتگو

ساجد علی جمعرات 14 مئی 2026 15:07

صومالی قزاقوں کا انوکھا مطالبہ! تاوان نہیں چاہیئے، صدر زرداری سے بات ..

کراچی (اُردو پوائنٹ اخبارتازہ ترین۔ 14 مئی2026ء) انسانی حقوق کے ممتاز کارکن انصار برنی نے صومالی قزاقوں کی قید میں موجود پاکستانیوں کی بازیابی کے حوالے سے انتہائی اہم انکشافات کیے ہیں، ان کا کہنا ہے کہ قزاقوں نے تاوان کے بجائے حکومتِ پاکستان سے براہِ راست رابطے کی شرط رکھ دی ہے۔ میڈیا سے گفتگو کرتے ہوئے انہوں نے بتایا کہ وہ پہلے دن سے مغویوں کے اہل خانہ کے ساتھ کھڑے ہیں اور اس سلسلے میں صومالی قزاقوں سے ان کا براہِ راست رابطہ ہوا ہے، ان کی صومالی قزاقوں اور وہاں قید پاکستانیوں سے مسلسل بات چیت چل رہی ہے، انہوں نے قزاقوں سے ان کے مطالبات دریافت کیے، جس پر قزاقوں نے کسی بھی قسم کے مالی تاوان کے مطالبے سے انکار کر دیا۔

انصار برنی نے قزاقوں کے حیران کن مطالبے کی تفصیلات بتاتے ہوئے کہا کہ قزاقوں کا کہنا ہے کہ ان کی صرف ایک ہی ڈیمانڈ ہے کہ وہ پاکستان کے صدر آصف علی زرداری سے براہِ راست بات کرنا چاہتے ہیں، قزاقوں نے واضح کیا ہے کہ وہ حکومتِ پاکستان کے علاوہ کسی بھی تیسرے فریق سے بات چیت کرنے کے حق میں نہیں ہیں، قزاقوں کا حکام کے ساتھ بھی رابطہ ہوا ہے اور وہ تمام معاملات حکومت کے ساتھ ہی طے کرنا چاہتے ہیں۔

(جاری ہے)

انصار برنی کا کہنا ہے کہ قزاقوں نے ان کی درخواست پر پاکستانی مغویوں سے بات کروائی ہے، قزاقوں نے پیغام دیا ہے کہ معاملے میں دیر ہو رہی ہے اور وہ جلد از جلد اس کا حل چاہتے ہیں، ہماری اس سلسلے میں حکومت سے اپیل ہے کہ ان کی جانب سے انسانی ہمدردی کی بنیاد پر اس معاملے کو سنجیدگی سے لیا جائے تاکہ سمندر پار قید پاکستانیوں کی بحفاظت واپسی ممکن ہو سکے۔