ہارون اختر سے سی ای او ملت ٹریکٹرز کی ملاقات، آئندہ وفاقی بجٹ، آٹو ،ٹریکٹر پالیسی اور مقامی مینوفیکچرنگ کے فروغ سے متعلق امور پر تبادلہ خیال

جمعرات 14 مئی 2026 19:58

اسلام آباد (اُردو پوائنٹ اخبارتازہ ترین - این این آئی۔ 14 مئی2026ء) وزیراعظم کے معاون خصوصی برائے صنعت و پیداوار ہارون اختر خان نے کہا ہے کہ حکومت صنعتی شعبے کو جدید خطوط پر استوار کرنے اور مسابقتی صلاحیت بہتر بنانے کیلئے اصلاحات کا عمل جاری رکھے ہوئے ہے، متوازن اور جامع اقتصادی ترقی کو یقینی بنانے کیلئے صنعتی اور زرعی دونوں شعبوں کو یکساں اہمیت دی جا رہی ہے۔

یہ بات انہوں نے جمعرات کو ملت ٹریکٹرز کے چیف ایگزیکٹو افسر(سی ای او)کے ساتھ ملاقات کے دوران کہی جنہوں نے وزیراعظم کے معاون خصوصی برائے صنعت و پیداوار ہارون اختر خان سے ملاقات کی جس میں آئندہ وفاقی بجٹ، آٹو پالیسی، ٹریکٹر پالیسی اور مقامی مینوفیکچرنگ کے فروغ سے متعلق امور پر تبادلہ خیال کیا گیا۔

(جاری ہے)

ملاقات کے دوران ہارون اختر خان نے اس بات پر زور دیا کہ حکومت وزیراعظم شہباز شریف کے وژن کے مطابق مقامی صنعت کو مضبوط بنانے کیلئے عملی اقدامات کر رہی ہے۔

انہوں نے کہا کہ معیشت کی بحالی اور پائیدار اقتصادی ترقی کیلئے صنعتی ترقی کے عمل کو تیز کیا جا رہا ہے۔معاون خصوصی نے کہا کہ آئندہ ٹریکٹر پالیسی کو کسان دوست اور صنعت دوست بنیادوں پر تشکیل دیا جا رہا ہے جس کا مقصد زرعی شعبے کی معاونت کے ساتھ ساتھ ملکی صنعتی استعداد میں اضافہ کرنا ہے۔ انہوں نے مزید کہا کہ آٹو پالیسی میں مقامی پیداوار، سرمایہ کاری اور پاکستان کے مینوفیکچرنگ شعبے میں تکنیکی ترقی کو ترجیح دی جائے گی۔

ہارون اختر خان نے کہا کہ برآمدات میں اضافہ معاشی استحکام اور طویل المدتی قومی ترقی کیلئے ناگزیر ہے۔ انہوں نے کہا کہ مقامی مینوفیکچرنگ کے فروغ سے روزگار کے مواقع پیدا ہوں گے، سرمایہ کاری میں اضافہ ہوگا اور برآمدات کو نمایاں فروغ ملے گا۔انہوں نے مزید کہا کہ حکومت صنعتی شعبے کو جدید خطوط پر استوار کرنے اور مسابقتی صلاحیت بہتر بنانے کیلئے اصلاحات کا عمل جاری رکھے ہوئے ہے۔ حکومت کے عزم کا اعادہ کرتے ہوئے ہارون اختر خان نے کہا کہ متوازن اور جامع اقتصادی ترقی کو یقینی بنانے کیلئے صنعتی اور زرعی دونوں شعبوں کو یکساں اہمیت دی جا رہی ہے۔