موٹروے پر جانوروں سے لدی گاڑیوں کے داخلے پر پابندی عائد کردی گئی

پابندی کا مقصد عیداالاضحیٰ کے دوران عوامی تحفظ اور ٹریفک کی روانی کو برقرار رکھنا ہے، ٹریفک قوانین اور لوڈنگ اسٹینڈرز کی خلاف ورزی پر سخت قانونی کارروائی کی جائے گی، ترجمان سنٹرل ریجن موٹروے

ثنااللہ ناگرہ ہفتہ 16 مئی 2026 23:53

لاہور (اردوپوائنٹ اخبار تازہ ترین۔ انٹرنیشنل پریس ایجنسی ۔ 16 مئی 2026ء ) لاہورموٹروے پر جانوروں سے لدی گاڑیوں کے داخلے پر پابندی عائد کردی گئی۔ترجمان سنٹرل ریجن موٹروے کے مطابق عیداالاضحیٰ کے دوران عوامی تحفظ اور ٹریفک کی روانی کو برقرار رکھنے کیلئے فیصلہ کیا گیا۔اوور لوڈ اور ان فٹ گاڑیاں سنگین حادثات کا سبب بن سکتی ہیں، جانوروں سے لدی گاڑیوں کو متبادل اور محفوظ راستوں پر منتقل کیا جائے گا، ایسی گاڑیوں کے باعث موٹرویز پر متعدد خطرناک حادثات پیش آچکے ہیں۔

پنجاب اور خیبرپختونخواہ پولیس کو انٹری پوائنٹس پر چیک پوسٹیں قائم کرنے کی ہدایت کی گئی ہے۔ مویشی منڈیوں اور انٹرچینج کے قریب غیرقانونی پارکنگ کے خلاف کاروائی کا حکم دیا گیا ہے۔ ٹریفک قوانین اور لوڈنگ اسٹینڈرز کی خلاف ورزی پر سخت قانونی کاروائی کی جائے گی۔

(جاری ہے)

پابندی کا مقصد حادثات کی روک تھام اور ٹریفک کی روانی کو برقرار رکھنے کیلئے ہے۔

دوسری جانب وزیر بلدیات ذیشان رفیق کی زیر صدارت سول سیکرٹریٹ میں ایک اجلاس کے دوران عیدالاضحیٰ کے لئے انتظامات کا جائزہ لے کر ضروری فیصلے کئے گئے ہیں۔ سیکرٹری لوکل گورنمنٹ شکیل احمد میاں اور متعلقہ میونسپل افسران نے بذریعہ ویڈیو لنک اجلاس میں شرکت کی۔ وزیراعلیٰ مریم نواز کی منظوری سے محکمہ بلدیات نے عیدالاضحیٰ کیلئے گائیڈ لائنز جاری کردیں۔

عید کے آخری دن تک میونسپل ملازمین اور سُتھرا پنجاب ورکرز کی چھٹیاں منسوخ کردی گئی ہیں۔ اجلاس میں کل (اتوار) تک پنجاب بھر میں عارضی کیٹل سیل پوائنٹس مکمل فعال کرنے کا فیصلہ بھی کیا گیا۔ وزیراعلیٰ مریم نواز شریف کی ہدایت پر امسال بھی جانوروں کی خرید وفروخت پر کوئی فیس نہیں وصول کی جائے گی۔ وزیر بلدیات ذیشان رفیق نے کہا کہ پنجاب کیٹل مارکیٹ مینجمنٹ کمپنی کی مویشی منڈیاں اور سیل پوائنٹس بھی سہولیات مہیا کریں گے جبکہ ہر شہر میں میونسپل کمیٹی بھی عارضی سیل پوائنٹس لگائے گی۔

انہوں نے زور دیتے ہوئے کہا کہ غیرقانونی سیل پوائنٹس اور سڑکوں پر خریدوفروخت کو سختی سے روکا جائے۔ ہر شہر میں موٹر سائیکل یا گاڑی پر مانیٹرنگ سٹاف 24 گھنٹے گشت کرے گا۔ شہریوں کی رہنمائی کیلئے رکشہ پر لاؤڈ سپیکروں کے ذریعے اعلان کرایا جائے۔ ذیشان رفیق نے یہ بھی کہا کہ سیل پوائنٹس پر سہولیات کی دستیابی کے حوالے سے نمایاں مقامات پر بینر لازمی لگائے جائیں۔

انہوں نے متعلقہ افسروں کو خبردار کیا کہ کوئی بیوپاری جانور پکڑ کر سیل پوائنٹس کے باہر نظر آیا تو کارروائی ہوگی۔

صوبائی وزیر نے مقامی میڈیا کے ارکان کو تمام عید پلان پر بریفنگ دینے کا حکم دیتے ہوئے کہا کہ گزشتہ دو سال کے تجربے کی روشنی میں اس بار زیادہ بہتر پرفارمنس دکھانا ہوگی۔ انہوں نے کہا کہ قربانی کرنے والے گھروں کا سروے کرکے ماحول دوست بیگ تقسیم کئے جائیں۔

علاوہ ازیں ہر یونین کونسل میں آگاہی کیمپ لگائے جائیں جہاں بیگز کی تقسیم شفاف انداز میں کی جائے۔ ذیشان رفیق نے کہا کہ دیہات میں آلائشیں مقامی سطح پر دفنانے کیلئے انتظامات کئے جائیں تاہم شہروں میں جگہ دستیاب ہو تو گڑھے کھودے جائیں ورنہ آلائشیں منتقل کی جائیں۔ الائشوں والے کولیکشن پوائنٹس کے گرد سبز کپڑے سے حدبندی کی جائے۔