وزیراعظم کا سخت محنت اور مسلسل کوششوں سے پاکستان میں ترقی کے لیے چین کا معاشی ماڈل اپنانے کے عزم کا اظہار

منگل 26 مئی 2026 20:52

بیجنگ(اُردو پوائنٹ اخبارتازہ ترین - این این آئی۔ 26 مئی2026ء) وزیرِ اعظم محمد شہباز شریف نے سخت محنت اور مسلسل کوششوں سے پاکستان میں ترقی کے لیے چین کا معاشی ماڈل اپنانے کے عزم کا اظہار کرتے ہوئے کہا ہے کہ چین کے ترقی، غربت ،بیروزگاری ،بیماریوں اور چیلنجز پر قابو پانے کیقابل رشک سفر سے دنیا کو سبق سیکھنا چاہیے،پاکستان چین دوستی کے درخت کی جڑیں بہت گہری ہیں،اس نے طوفانوں کا سامنا کیا ہے ،سایہ فراہم کیا ہے اور بہت میٹھے پھل دیے ہیں ہماری مشترکہ ذمہ داری ہے کہ اس کی نئی شاخیں پروان چڑھائیں تاکہ آنے والی نسلیں وہ ورثہ حاصل کریں جو ہمارے آباؤ اجداد کے تصور سے بھی زیادہ مضبوط تعلقات کا حامل ہو۔

وہ منگل کو یہاں پاک۔چین سفارتی تعلقات کی 75 ویں سالگرہ کے حوالے سے خصوصی تقریب سے خطاب کررہے تھے۔

(جاری ہے)

تقریب میں عوامی جمہوریہ چین کے نائب صدر ہان زینگ اور پاکستان کے وفد کے ارکان اور دیگر شخصیات نے بھی شرکت کی۔ وزیر اعظم نے کہا کہ بیجنگ میں ہمارے دونوں عظیم ممالک کے درمیان سفارتی تعلقات کی 75 ویں سالگرہ کی تقریب میں شرکت میرے لیے ایک اعزاز ہے،ہمارے عظیم رہنماؤں نے پچھلے سات عشروں سے زیادہ عرصے میں یہ تعلقات بڑی لگن، عقیدت اور خلوص کے ساتھ استوار کیے ہیں،یہ تعلقات اب ایک ایسے بلند مقام پر پہنچ چکے ہیں کہ ان کا کوئی ثانی نہیں اور نہ ہی ان جیسی کوئی مثال مل سکتی ہے، ان سات عشروں میں چین نے سخت اور انتھک محنت سے جنگ کی راکھ سے اٹھ کر شان و شوکت کی بلند ترین چوٹی تک پہنچنے کا سفر طے کیا ہے یہ قابل رشک سفر ہے جس سے دنیا کے تمام ممالک کو سبق سیکھنا چاہیئے کہ کیسے غربت ،بے روزگاری ،بیماریوں اور چیلنجز پر قابو پایا جائے۔

اگر ثابت قدم رہیں تو آخر کار وہ حاصل ہوتا ہے جو چین نے حاصل کیا ہے۔چین آج ایک عالمی معاشی طاقت اور عالمی فوجی طاقت ہے اور یہ دونوں ممالک کی دوستی کا سنہرا دور ہے۔وزیراعظم نے اپنے سکول کے زمانے میں چین کے سابق وزیراعظم چو این لائی کے پاکستان کے دورے اور لاہور ائر پورٹ پر اساتذہ اور طلبا کے ساتھ ان کے استقبال کا یادگار واقعہ بیان کیا۔وزیراعظم نے کہا کہ 2010ء میں پاکستان میں شدید سیلاب آیا تو چین کی حکومت نے فوری طور پر پاکستانی بھائیوں کی دل کھول کے مدد کی،ریسکیو ہیلی کاپٹرز اور ریسکیو ٹیمیں،ادویات اور دیگر سامان بھجوایا،چینی بھائیوں اور بہنوں، ڈاکٹروں اور ماہرین نے سیلاب زدہ علاقوں میں متاثرین کی بھرپور مدد کی۔