ی*رانا ثناء اللہ کا بیان افسوسناک اور غریب دشمن ذہنیت کی عکاسی کرتا ہے،ندیم افضل چن

ہفتہ 6 جون 2026 18:00

Kاسلام آباد(اُردو پوائنٹ اخبارتازہ ترین - آن لائن۔ 06 جون2026ء) پاکستان پیپلز پارٹی کے مرکزی رہنما ندیم افضل چن نے رانا ثناء اللہ کے حالیہ بیان پر شدید ردعمل کا اظہار کرتے ہوئے کہا ہے کہ ان کا بیان افسوسناک اور غریب دشمن ذہنیت کی عکاسی کرتا ہے۔اپنے بیان میں ندیم افضل چن نے کہا کہ جس پروگرام کی شفافیت اور افادیت کی گواہی بین الاقوامی مالیاتی ادارے ، ایشیائی ترقیاتی بینک اور متعدد معتبر تحقیقاتی ادارے دے چکے ہیں، وہ بعض سیاسی عناصر کو آج بھی قابل قبول نہیں۔

انہوں نے کہا کہ بعض لوگ آج بھی شہید محترمہ بینظیر بھٹو کی عوامی میراث اور ان کے نام سے منسوب فلاحی منصوبوں سے خوفزدہ ہیں۔ ان کا کہنا تھا کہ یہ ایک ناقابل تردید حقیقت ہے کہ بینظیر انکم سپورٹ پروگرام لاکھوں غریب خاندانوں، خصوصاً خواتین، کے لیے معاشی سہارا اور امید کی کرن ثابت ہوا ہے۔

(جاری ہے)

ندیم افضل چن نے کہا کہ مخالفین کی سیاست کا مرکز غریب آدمی نہیں بلکہ اشرافیہ اور مخصوص کاروباری مفادات ہیں، جبکہ بینظیر انکم سپورٹ پروگرام ملک کے محروم اور کمزور طبقات کی فلاح و بہبود کے لیے قائم کیا گیا تھا۔

انہوں نے افسوس کا اظہار کرتے ہوئے کہا کہ اب ایسے بیانات سامنے آ رہے ہیں جو غریب عوام کے منہ سے نوالہ چھیننے کے مترادف ہیں۔ انہوں نے مطالبہ کیا کہ سیاسی اختلافات کو عوامی فلاحی منصوبوں سے نہ جوڑا جائے۔ندیم افضل چن نے کہا کہ خدارا شہید محترمہ بینظیر بھٹو سے جو سیاسی اختلاف یا بغض ہے، اس کا انتقام پنجاب سمیت ملک بھر کے غریب عوام سے نہ لیا جائے۔ انہوں نے مزید کہا کہ بینظیر انکم سپورٹ پروگرام کو عالمی سطح پر ایک کامیاب سماجی تحفظ کے ماڈل کے طور پر سراہا گیا ہے اور یہ پروگرام لاکھوں مستحق خاندانوں کی زندگیوں میں مثبت تبدیلی لا رہا ہے۔