بھارتی سکھ یاتریوں کی مختلف مقدس مقامات کی یاترا مکمل، مرکزی تقریب 29 جون کو گوردوارہ ڈیرہ صاحب میں ہوگی

اتوار 28 جون 2026 00:04

اسلام آباد (اُردو پوائنٹ اخبارتازہ ترین - اے پی پی۔ 28 جون2026ء) مہاراجہ رنجیت سنگھ کی برسی کی تقریبات میں شرکت کے لیے 21 جون کو واہگہ بارڈر کے ذریعے پاکستان آنے والے بھارتی سکھ یاتریوں نے ملک بھر میں واقع مقدس سکھ مذہبی مقامات کی یاترا کامیابی سے مکمل کر لی ہے اور طے شدہ شیڈول کے مطابق لاہور واپس پہنچ گئے ہیں۔ترجمان کے مطابق یاتریوں نے اپنے دس روزہ قیام کے دوران گوردوارہ جنم استھان ننکانہ صاحب، گوردوارہ سچا سودا فاروق آباد، گوردوارہ پنجہ صاحب حسن ابدال، گوردوارہ دربار صاحب کرتارپور، گوردوارہ روڑی صاحب ایمن آباد سمیت دیگر مقدس گوردواروں پر حاضری دی، مذہبی رسومات ادا کیں اور اپنی عقیدت کا اظہار کیا۔

لاہور واپسی پر سکھ یاتری گوردوارہ ڈیرہ صاحب میں مقیم ہیں جہاں وہ آئندہ دوروز تک قیام کریں گے۔

(جاری ہے)

مہاراجہ رنجیت سنگھ کی برسی کی مرکزی مذہبی تقریب 29 جون کو گوردوارہ ڈیرہ صاحب میں منعقد ہوگی جبکہ مذہبی تقریبات کے اختتام پر یاتری 30 جون کو واہگہ بارڈر کے راستے بھارت روانہ ہو جائیں گے۔متروکہ وقف املاک بورڈ نے گوردوارہ ڈیرہ صاحب میں یاتریوں کی رہائش اور سہولیات کے لیے جامع انتظامات کیے ہیں۔

شدید گرمی کے پیش نظر اضافی ایئر کنڈیشنرز نصب کیے گئے ہیں، بجلی کی بلا تعطل فراہمی یقینی بنانے کے لیے اضافی جنریٹرز فراہم کیے گئے ہیں جبکہ رہائش، لنگر، آمدورفت، طبی سہولیات اور منرل واٹر سمیت تمام بنیادی انتظامات مکمل کر لیے گئے ہیں۔ان انتظامات کی نگرانی ایڈیشنل سیکرٹری شرائنز ناصر مشتاق کر رہے ہیں۔ انہوں نے کہا کہ سکھ یاتریوں کو محفوظ، پُرامن اور خوشگوار ماحول فراہم کرنا متروکہ وقف املاک بورڈ کی اولین ترجیح ہے۔انہوں نے کہا کہ متروکہ وقف املاک بورڈ مذہبی سیاحت کےفروغ، بین المذاہب ہم آہنگی کے استحکام اور اقلیتی برادریوں کے مقدس مذہبی مقامات کے تحفظ اور خدمت کے لیے اپنی ذمہ داریاں بھرپور انداز میں ادا کرتا رہے گا۔